Нацбанку проста не падабаюцца чэргі ля абменнікаў

• 26.08.2011, 13:35

Нацыянальны банк Беларусі не забараняў банкам прадаваць валюту.

Такі каментар распаўсюдзіла прэс-служба галоўнага банка краіны.

«У апошнія дні ў шэрагу беларускіх і замежных сродкаў масавай інфармацыі з'явіліся паведамленні аб тым, што Нацыянальны банк Рэспублікі Беларусь нібыта «забараніў камерцыйным банкам рэспублікі прадаваць насельніцтву наяўную замежную валюту праз абменныя пункты», гаворыцца ў каментары.

«Гэтая інфармацыя абсалютна не адпавядае рэчаіснасці», падкрэслівае прэс-служба Нацбанка.

Забарону на продаж валюты на тэрыторыі буйных гандлёвых цэнтраў і рынкаў ўвялі з лепшых падахвочванняў і звязаная яна «з неабходнасцю ўпарадкавання сітуацыі вакол абменных пунктаў, размешчаных у буйных гандлёвых цэнтрах і на рынках».

«Маніторынг паказвае, што ў гэтых месцах назіраюцца чэргі з тых, хто жадае набыць валюту. Пры гэтым у чэргах практычна прысутнічаюць адны і тыя ж асобы, якія з вялікай доляй верагоднасці набываюць замежную валюту для далейшага яе продажу на нерэгулюемых сегментах валютнага рынку», абураецца прэс-служба Нацбанка.

«Наяўнасць чэргаў у абменных пунктаў не толькі замінае нармальнай працы персаналу гандлёвых цэнтраў і рынкаў, але і стварае значныя нязручнасці для іх наведвальнікаў», робіць выснову Нацбанк.

У сувязі з гэтым буйным беларускім банкам, якія маюць пункты абмену валюты на тэрыторыі гандлёвых цэнтраў і рынкаў, дадзенае права сумесна з кіраўніцтвам гэтых гандлёвых аб'ектаў вызначыцца - ці жадаюць яны выкарыстоўваць прапанаваны ў лісце Нацбанка рэжым працы абменных пунктаў, і ў якіх канкрэтных абменных пунктах.

Усе астатнія абменныя пункты рэспублікі, г.зн. абсалютная большасць, будуць здзяйсняць аперацыі як па куплі, так і па продажу валюты.