Матэа Мечаці: Самавольства ў цэнтры Еўропы непрымальнае

• 1.09.2011, 15:40

Старшыня камітэта па дэмакратыі, правах чалавека і гуманітарных пытаннях Парламенцкай асамблеі АБСЕ Матэа Мечаці заклікаў беларускія ўлады спыніць ціск на праваабаронцаў.

Пра гэта паведамляе БелаПАН са спасылкай на прэс-службу ПА АБСЕ.

«Гэта непрымальна, калі ў цэнтры Еўропы грамадзянскія актывісты падвяргаюцца крымінальнай пераследу. Бяляцкі быў арыштаваны неабгрунтавана, і ён павінен быць неадкладна вызвалены», - заявіў Мечаці.

Віцэ-прэзідэнт Міжнароднай федэрацыі правоў чалавека, кіраўнік закрытага беларускімі ўладамі праваабарончага цэнтру «Вясна» Алесь Бяляцкі быў затрыманы ў Менску ўвечары 4 жніўня. 5 жніўня ў дачыненні да затрыманага абралі меру стрымання ў выглядзе заключэння пад варту. 12 жніўня праваабаронцу прад'явілі абвінавачванне па частцы 2 артыкула 243 Крымінальнага кодэкса (утойванне прыбыткаў у асабліва буйным памеры) і працягнулі тэрмін утрымання пад вартай на два месяцы.

Арышт Бяляцкага выклікаў шырокі міжнародны рэзананс. Вызвалення праваабаронца запатрабавалі кіраўніцтва Еўрасзвяза, ЗША і іншых дзяржаваў, праваабарончыя структуры, вядомыя грамадскія дзеячы і палітыкі.