Мытная пошліна - па афіцыйным курсе

• 15.09.2011, 12:43

У Беларусі мытныя пошліны і зборы, які вылічваюцца ў замежнай валюце і прызначаныя да выплаты ў беларускіх рублях, будуць і далей пералічвацца па афіцыйным курсе Нацбанка на дзень плацяжу.

Пра гэта «Інтэрфакс Захад» паведамілі ў Дзяржаўным мытным камітэце Беларусі.

«На сённяшні дзень існуе адзіны парадак спагнання мытных пошлін - гэта стаўка пошліны, у тым ліку і стаўкі, усталяваныя ў далярах ці еўра, і курс Нацбанка на дзень плацяжу. Гэта прадугледжана законам, які з'яўляецца адзіным для трох краін Мытнага саюза», - заявіў у чацвер на прэс-канферэнцыі ў Менску намеснік старшыні ДМК краіны Сяргей Барысюк.

Такім чынам ён адказаў на пытанне журналістаў аб тым, як будуць выплачвацца мытныя плацяжы па вылічаных у валюце стаўках пошлін пасля адкрыцця дадсесіі таргоў валютай на БВФБ.

С. Барысюк дадаў, што для змены існуючага парадку выплаты мытных пошлін неабходна ўнесці адпаведныя змены ў заканадаўства.