Стаўку рэфінансавання зноў павысяць

• 19.09.2011, 14:05

У Беларусі з 1 кастрычніка можа быць павышаная стаўка рэфінансавання.

Пра гэта БелТА паведаміла старшыня праўлення Нацбанка Беларусі Надзея Ермакова.

Адказваючы на пытанне аб тым, ці плануецца ў бліжэйшы час павышэнне стаўкі рэфінансавання, кіраўніца Нацбанка сказала: «Гэта будзе залежаць ад таго, як будзе ісці інфляцыя. Я думаю, што прыйдзецца павышаць. Як толькі мы даведаемся новую статыстыку па інфляцыі, мы вызначымся па стаўцы рэфінансавання».

Надзея Ермакова нагадала, што ў папярэдні раз стаўка рэфінансавання была падвышаная з 14 верасня да 30% гадавых. «Праз тыдзень будзем яшчэ раз разглядаць. Магчыма, што з 1 кастрычніка, і хутчэй за ўсё, прыйдзецца павышаць», - заявіла старшыня праўлення Нацбанка.

Пры гэтым яна не ўдакладніла, на колькі можа быць павышаная стаўка рэфінансавання. «Гэтага я не магу сказаць, бо гэта залежыць ад таго, якая будзе інфляцыя», - сказала Надзея Ермакова, дадаўшы, што Нацбанк таксама будзе ўлічваць ўплыў стаўкі рэфінансавання на крэдытаздольнасць эканомікі.