Гандаль рабамі ў цэнтры Еўропы
- 2.09.2011, 4:30
Аляксандр Лукашэнка паабяцаў вызваліць усіх палітвязняў у краіне да сярэдзіны кастрычніка 2011 года.
Пра гэта паведамляе 1 верасня Reuters. У распараджэнне агенцтва патрапіў ліст кіраўніка МЗС Балгарыі Мікалая Младэнава кіраўніку знешняй палітыкі Еўразвяза Кэтрын Эштан і міністрам замежных справаў еўрапейскага блока. Па словах Младэнава, які ў канцы жніўня сустракаўся з Лукашэнкам, беларускі дыктатар паабяцаў вызваліць актывістаў апазіцыі, якія знаходзяцца ў зняволенні, на працягу паўтарох месяцаў. Таксама ён плануе арганізаваць круглыя сталы з апазіцыяй па пытаннях развіцця краіны.
Младэнаў удакладніў, што жаданне Лукашэнкі палепшыць адносіны з Еўразвязам, відавочна, звязанае з эканамічнымі санкцыямі, уведзенымі еўрапейскім блокам у адказ на палітычныя рэпрэсіі пасля беспарадкаў у Менску 19 снежня 2010 года.
Крыніца Reuters у дыпламатычных колах адзначыла, што Лукашэнка вырашыў скарыстацца паслугамі Балгарыі як пасярэдніка на перамовах з ЕЗ пасля таго, як гэтую функцыю адмовіліся выконваць Італія і Літва.
Тым часам, 1 верасня дыктатар ўжо памілаваў чацвярых удзельнікаў снежаньскіх хваляванняў.
Лукашэнка падпісаў указ аб «памілаванні» пасля разгляду адпаведных прашэнняў апазіцыянераў. Рашэнне было прынятае з улікам таго, што асуджаныя «заявілі аб раскаянні, прызнанні віны, ўсведамленні супрацьпраўнага характару сваіх дзеянняў і аб гатовасці ў далейшым строга выконваць заканадаўства Беларусі».
Прозвішчы памілаваных ў прэс-службе не назвалі, але, па дадзеных незалежных СМІ, на волю выходзяць Алесь Кіркевіч, Андрэй Пратасеня, Алег Гнедчык і Зміцер Даронін. Кандыдаты ў прэзідэнты Андрэй Саннікаў, Мікалай Статкевіч і Зміцер Ус, якія таксама знаходзяцца ў зняволенні пасля снежаньскіх падзеяў, прашэнняў аб памілаванні не падавалі.
11 жніўня стала вядома аб тым, што Лукашэнка памілаваў дзевецярых удзельнікаў беспарадкаў у Менску. Былых супернікаў Лукашэнкі на выбарах сярод іх таксама не апынулася.
19 снежня 2010 года, у дзень прэзідэнцкіх выбараў, беларуская апазіцыя вывела на вуліцы дзясяткі тысяч людзей.