Аляксандр Атрошчанкаў: Ціск на рэжым Лукашэнкі павінны працягвацца

• 21.09.2011, 16:51

Палітвязні Аляксандр Атрошчанкаў, Зміцер Новік, Павел Вінаградаў і Мікіта Ліхавід, якія тыдзень таму былі вызваленыя з калоній, сустрэліся з дыпламатамі краін ЕЗ.

На сустрэчы з амбасадаркай Вялікабрытаніі Розмары Томас, Надзвычайным і Паўнамоцным Амбасадарам Каралеўства Нідэрландаў, спецпрадстаўніком «Усходняга партнёрства» Клаасам Ван Дэр Тэмпелем, сябрам брытанскага Парламента Джонам Мэнам, першым сакратаром амбасады Вялікабрытаніі Стэфанам Джадам прысутнічала маці Мікіты Ліхавіда Алена, а таксама была запрошаная нявеста палітвязьня Зміцера Дашкевіча Анастасія Палажанка, але два дні таму яна была арыштаваная.

Палітвязні распавялі пра тое, што адбывалася з імі пасля арыштаў, а таксама падзяліліся занепакоенасцю лёсам тых, хто застаецца за кратамі.

«Гэта не першая сустрэча палітвязняў і іхніх сваякоў з дыпламатамі за апошнія дні. Мы бачым, што рэжым актывізаваўся на заходнім напрамку. Пры гэтым ціск на нашых таварышаў, якія застаюцца за кратамі, узрос шматкроць. Ёсць падазрэнні аб тым, што ў дачыненні да іх прымяняюцца катаванні.

Мы кажам пра тое, што не бачым ніякіх падставаў для змены пазіцыі міжнароднай супольнасці адносна беларускага рэжыму. Гаворым пра тое, што прынятыя да гэтага часу крокі, размовы пра «дыялог» - усяго толькі прафанацыя, чарговы падман, неабходнасць якога выкліканая поўным банкруцтвам палітыкі Лукашэнкі. Але важна разумець, што праблемы Беларусі ляжаць у большай ступені ў сферы палітыкі, чым у сферы эканомікі», - распавёў Аляксандр Атрошчанкаў.