Германія: Санкцыі ЕЗ супраць беларускага рэжыму могуць быць больш жорсткімі

• 28.09.2011, 15:54

Канцлер ФРГ Ангела Меркель мае намер сустрэцца з прадстаўнікамі беларускай апазіцыі ў ходзе саміту «Усходняе партнёрства» у Варшаве.

Аб гэтым паведамляе Deutsche Welle са спасылкай на ведамства федэральнага канцлера.

Канцлер Германіі Ангела Меркель мае намер сустрэцца з беларускімі апазіцыянерамі ў ходзе саміту «Усходняе партнёрства» у сталіцы Польшчы Варшаве ўвечары 29 верасня. Як паведаміла 27 верасня крыніца ў ведамстве федэральнага канцлера, Берлін пагражае аўтарытарнаму рэжыму ў Менску больш жорсткімі санкцыямі. Такім чынам, урад ФРГ дэманстратыўна выказвае падтрымку беларускай апазіцыі, адзначае агенцтва dpa.

У ведамстве адзначылі, што канцлеру атрымалася дамагчыся адсутнасці ў Варшаве падвергнутага міжнароднай ізаляцыі Аляксандра Лукашэнкі.

Як падкрэслілі ў ведамстве федэральнага канцлера, гэта яскравы сігнал ўрада ФРГ аб тым, што ён не мае намеру мірыцца з тым, як афіцыйны Менск абыхдзіцца з прадстаўнікамі апазіцыі і грамадзянскай супольнасці. Тры былых кандыдата ў прэзідэнты Беларусі па-ранейшаму знаходзяцца ў турме, некаторыя іншыя былі вызваленыя, аднак яны да гэтага часу не рэабілітаваныя.

Крыніца ў ведамстве федэральнага канцлера папярэдзіла, што калі Менск не зменіць сваёй палітыкі, то санкцыі ЕЗ супраць беларускага рэжыму могуць быць больш жорсткімі. У цяперашні час у дачыненні да Лукашэнкі і больш за 100 яго паплечнікаў дзейнічае забарона на ўезд у краіны ЕЗ, іхнія рахункі ў Еўразвязе замарожаныя. Гэтыя санкцыі, аднак, могуць быць распаўсюджаныя і на тых прыхільнікаў рэжыму, якія ўдзельнічаюць у судовых працэсах над апазіцыянерамі, адзначыла крыніца.