Нік Клег: Трэба ўзмацніць ціск на беларускі рэжым
- 29.09.2011, 12:06
Беларусь як Паўночная Карэя, Зімбабвэ і Іран, але знаходзіцца ў цэнтры Еўропы.
З нагоды адкрыцця саміту «Усходняга партнёрства» польская прэса публікуе шэраг артыкулаў, дзе вялікая ўвага надаецца таксама Беларусі.
Міністр па еўрапейскіх справах Мікалай Даўгілевіч, адказваючы на пытанне «Gazeta Wyborcza» аб стварэнні Еўрапейскага фонду за дэмакратыю (такое рашэнне маюць намер прыняць ўдзельнікі саміту) адзначыў:
«Гаворка ідзе аб фондзе, які будзе мець магчымасць працаваць хутка і нестандартна, каб, напрыклад, падтрымаць незалежную прэсу ў нейкай краіне. Інакш, як звычайна гэта робіцца, будзе магчымасць перадаць такія сродкі, не ўзгадняючы гэтыя крокі з уладамі дадзенай краіны. Таму мы не будзем пытацца ва ўладаў Беларусі, ці можна нам падтрымаць беларускую грамадзянскую супольнасць».
«Gazeta Wyborcza» таксама друкуе адмысловы матэрыял віцэ-прэм'ера Вялікабрытаніі Ніка Клега пад загалоўкам «Беларусь: сарамлівая тайна Еўропы». Брытанскі палітык піша:
«Прапаную ўявіць сабе краіну, дзе катаванні і запалохванне людзей гэта штодзённая рэч. Дзе людзей, якія мірна пратэстуюць, арыштоўваюць і накіроўваюць у калоніі ўзмоцненага рэжыму і дзе пераследуюць журналістаў, якія дэманструюць свабоду думкі. Дзе прэзідэнт можа маніпуляваць чарговымі выбарамі, нягледзячы на тое, што ён давёў эканоміку да краху. Дзе большасць занадта запалоханыя, каб выказваць уласныя думкі і дзе да гэтага часу ёсць смяротнае пакаранне. Гэта магла б быць Паўночная Карэя, Зімбабвэ і Іран. Але гэтая краіна знаходзіцца бліжэй да нас, у Еўропе. Гэта - Беларусь, дзе рэжым Лукашэнкі надалей моцнай рукой трымае ўладу, наогул не звяртаючы ўвагі на правы чалавека».
Брытанскі віцэ-прэм'ер дэталёва распавядае аб расправе рэжыму над удзельнікамі акцый маўклівага пратэсту.
«20 год таму распаўся СССР. Мы, еўрапейцы, верылі, што небяспечныя дыктатары адыдуць у мінулае, а свабода і дэмакратыя будуць квітнець. Аднак Беларусь да гэтага часу застаецца ў пастцы мінулага - гэта сарамлівая тайна Еўропы, тут, за нашым ганкам. Таму я цалкам упэўнены - мы павінныя ўзмацніць ціск на рэжым. Наш урад у Польшчы пакажа сваю салідарнасць з народам Беларусі. Вялікабрытанія не дазволіць цягнуць Беларусі ў змрочныя часы. Еўропа зайшла занадта далёка, каб гэта дапусціць», - напісаў віцэ-прэм'ер Вялікабрытаніі Нік Клег.
Пераклад - «Радыё Свабода»