Мадэратарам на валютнай біржы будзе Лукашэнка
- 9.09.2011, 10:36
Толькі дыктатар размяркоўвае валютныя плыні, і менавіта ён спыніў продаж валюты ў лютым.
Беларуская валютна-фондавая біржа ўчора правяла тэставыя таргі дадатковай сесіі, на якой будзе вызначацца рынкавы курс нацыянальнай валюты. Сталыя таргі на другой сесіі біржы павінныя пачацца праз тыдзень, паведамляе «Радыё Свабода».
Супрацоўнік Беларускай валютна-фондавай біржы Віталь Ціханаў паведаміў, што на «рэпетыцыі» дадатковых таргоў не было ніякіх рэальных угод, ніякіх разлікаў ці вынікаў у выглядзе курсаў валют таксама не будзе. Фактычна гэта праверка сістэмы таргоў, іхніх тэхнічных і арганізацыйных момантаў:
«Гэта звычайнае тэставанне сістэмы з прыцягненнем старонніх удзельнікаў. Гэта як навучальныя таргі, калі да нас прыходзяць студэнты і набіраюць нейкія лічбы, каб праверыць працаздольнасць сістэмы, дзе могуць быць недахопы, каб потым зрабіць высновы, як усё працуе, ці ўсё ўсіх задавальняе, можа, каму інтэрфейс трэба памяняць ці яшчэ што -небудзь», - паведаміў Ціханаў.
Ціханаў паведаміў, што для таргоў будзе выкарыстоўвацца сістэма курсаўтварэння «фіксінг», прынятая ў многіх краінах, дзе курсы валют вызначаюцца на таргах. Раней была інфармацыя, што першыя рэальныя таргі на валютнай біржы ў межах другой сесіі пройдуць роўна праз тыдзень, 15 верасня. Але Віталь Ціханаў не змог пацвердзіць гэтую дату:
«Мы працуем згодна з дзеючым рэгламентам, калі будзе зацверджаны новы - залежыць не ад нас».
Пераход да рынкавага курсаўтварэння ў доўгатэрміновай перспектыве пазітыўна паўплывае на эканоміку, перакананы старэйшы аналітык FOREX CLUB ў Беларусі Валер Палхоўскі. Высокі курс замежнай валюты будзе стымуляваць імпартазамяшчэнне:
«Больш высокі курс валют, які заўсёды будзе на свабоднай сесіі ў нашых умовах, таму што попыт ўсё ж будзе стала перавышаць прапанову, будзе стымуляваць структурную перабудову эканомікі. Сам па сабе гэты механізм правільны, іншая справа - як ён будзе рэалізаваны, наколькі інтэнсіўна будзе прымаць удзел Нацбанк у гэтай сесіі, ці будзе ён спрабаваць стрымліваць валюту на верхняй мяжы калідора, які ён вызначае сам сабе».
У Нацбанку ж паведамілі, што ў апошні час там павялічылі золатавалютныя рэзервы, якія могуць выкарыстоўвацца, каб «згладжваць» асобныя спекулятыўныя хваляванні на біржы.
Валер Палхоўскі дапускае «кропкавыя інтэрвенцыі» Нацбанка, але не больш, бо рэсурсаў для фіксаванага валютнага курсу ў яго няма. Іншы фінансавы аналітык, Уладзімір Тарасаў, мяркуе, што вырашаць, рабіць інтэрвенцыі ці не, будзе не Нацбанк, які выступае на біржы як фармальны мадэратар:
«На самой справе гэта будзе вырашаць не Нацбанк, а Лукашэнка. Гэта ж ён у нас размяркоўвае валютныя плыні. Менавіта ён спыніў продаж валюты ў лютым. Таму будуць тэлефанаваць яму і пытацца, ці трэба нам падтрымліваць курс. А ён ужо скажа, трэба ці не», - мяркуе Тарасаў.
На думку Тарасава, Аляксандр Лукашэнка такім чынам выконвае функцыі фактычнага мадэратара валютнага рынку.
Тым часам чорны наяўны рынак працягвае існаваць, нягледзячы на адміністрацыйныя і крымінальныя справы супраць валютчыкаў. Па словах спецыялістаў, ягоны штодзённы абарот складае каля 22 мільёнаў даляраў.
Па-ранейшаму дзейнічаюць шэрыя схемы і на так званым міжбанку - напаўлегальным рынку безнаяўнай валюты, які Нацбанк таксама хоча закрыць. Тут курс складае каля 9 тысяч рублёў за даляр.