Куляшова ў Францыі сустрэлі судовым пазовам
- 19.01.2012, 19:29
(абноўлена) Адвакат Уільям Бурдон 19 студзеня падаў ў французскі суд пазоў супраць міністра ўнутраных спраў Беларусі Анатоля Куляшова.
Бурдон дзейнічае ад імя ініцыятывы Free Belarus Now, якая абвінавачвае кіраўніцтва сваёй краіны ў арганізацыі катаванняў палітвязняў.
На думку адваката, французская паліцыя павінная неадкладна арыштаваць Куляшова, які знаходзіцца ў французскім Ліёне на канферэнцыі Інтэрпола. Бурдон растлумачыў, што следчыя абавязаныя высветліць ступень удзелу кіраўніка беларускага МУС у падаўленні выступленняў апазіцыі і далейшых катаваннях арыштаваных у Менску людзей.
Адвакат абвясціў, што прадстаўляе частку тых апазіцыянераў, хто быў арыштаваны 19 снежня 2010 года на мітынгу супраць фальсіфікацыі прэзідэнцкіх выбараў у Менску.
У той дзень на вуліцы беларускай сталіцы выйшлі дзесяткі тысяч беларусаў, нязгодных з афіцыйнымі вынікамі выбараў, паводле якіх Аляксандр Лукашэнка ў чацвёрты раз быў пераабраны прэзідэнтам. На разгон пратэстуючых ўлады кінулі АМАП. У ходзе жорсткага разгону дэманстрантаў каля 700 чалавек былі затрыманыя. Частка апазіцыянераў, у прыватнасці - шэраг супернікаў Лукашэнкі на выбарах, атрымалі за ўдзел у дэманстрацыі турэмныя тэрміны і да гэтага часу знаходзяцца за кратамі.
Беларускія ўлады пакуль ніяк не адрэагавалі на пазоў супраць кіраўніка МУС рэспублікі.
У заяве ініцыятывы Free Belarus Now, якая паступіла на адрас сайта charter97.org, гаворыцца, што Куляшоў знаходзіцца ў спісе беларускіх чыноўнікаў, якія не маюць права на паездкі ў межах ЕЗ пасля гвалтоўнага падаўлення беларускім урадам акцыі апазіцыі пасля прэзідэнцкіх выбараў у снежні 2010 года.
У верасні мінулага года Free Belarus Now сумесна з юрыдычнай фірмай McCue&Partners LLP абвясціла, што яны зрабілі крымінальны пераслед беларускага кіраўніцтва агульнадасяжным для любога ўрада, няўрадавых арганізацый або прыватнага адваката. Анатоль Куляшоў павінен зараз паўстаць перад абвінавачаннем у Францыі за міжнародныя злачынствы ў выглядзе катаванняў і захопу закладнікаў.
Ірына Багданава, адна з заснавальнікаў Free Belarus Now, кажа: «Як такое можа быць, каб беларускіх палітычных бежанцаў, якія пацярпелі ад эмацыйных і фізічных катаванняў у турме КДБ, шукалі Інтэрполам? Яны былі затрыманыя падчас падарожжа па Еўропе, у той час як Куляшоў, які кіраваў жорсткім разгонам мірнай дэманстрацыі, падарожнічае беспакарана. 19 снежня мінулага года рэпрэсіі супраць мірнай апазіцыі прывялі да ваеннага перавароту, і я не магу паверыць, што адзін з завадатараў гэтага вітаецца тымі, хто называе сябе захавальнікамі закона і парадку. Я заклікаю французскія ўлады дзейнічаць хутка і прыцягнуць Куляшова да адказнасці за ягоныя злачынствы супраць беларускага народа».
Мэцью Джуры, партнёр McCue&Partners, кажа: «Францыя абавязаная ўзяць Куляшова пад варту за ўдзел у катаваннях і ўзяцце у закладнікі невінаватых беларусаў. Маральны аўтарытэт Францыі пахіснецца, калі яна будзе не ў стане прыняць меры. Калі гэтага не адбудзецца, то мы заклікаем грамадзянскую супольнасць Францыі забяспечыць выкананне закона».
Наталля Каляда, адна з заснавальнікаў Free Belarus Now і Беларускага Свабоднага тэатра, кажа: «Французская Рэспублiка заснаваная на прынцыпах свабоды, роўнасці і братэрства, а сёння гэтыя прынцыпы падаюцца вельмі далёкімі. Запрашаючы агентаў рэжыму Лукашэнкі, якія асабіста арганізавалі масавыя гвалтоўныя арышты мірных дэманстрантаў, Францыя здрадзіла ўсім, хто змагаецца за дэмакратыю і правы чалавека ў Беларусі. Ёсць 15 палітычных зняволеных, якія застаюцца за кратамі ў маёй краіне ў цэнтры Еўропы. Гэтыя людзі разам з іншымі былі арыштаваныя і падвергнуты катаванням, знаходзячыся пад вартай у КДБ у снежні мінулага года. Сёння Інтэрпол вітае эмісара апошняй дыктатурай у Еўропе і асуджае тых, хто мірна супрацьстаяў ім як злачынцам. Гэтая крывадушнасць здаецца неймавернай у сучаснай дэмакратыі, я магу толькі спадзявацца, што Інтэрпол і французскія ўлады будуць дзейнічаць аператыўна».