Валянцін Стэфановіч: Дзіўна чуць аб праве на жыццё ад Лукашэнкі

• 16.10.2012, 12:31

Праваабаронца пракаментаваў заяву дыктатара пра пару палітвязняў і яго вызначэнне праў чалавека.

«Вельмі цікавы факт, што ён прызнаў наяўнасць палітвязняў. Але ў нас не пяцёра і не двое палітычных вязняў. Пасля вызвалення Сяргея Каваленкі і Паўла Сырамалотава ў турмах засталося 12 палітвязняў», - распавёў сайту charter97.org намеснік кіраўніка праваабарончага цэнтра «Вясна» Валянцін Стэфановіч.

Па словах праваабаронцы, правы чалавека нашмат большыя, чым проста права на годны заробак. «Права на годны заробак - гэта, вядома, добра. Але Беларусь у рамках ААН і АБСЕ ўзяла на сябе абавязацельства абараняць усе ўніверсальныя правы і свабоды чалавека і грамадзяніна. А іх значна больш, чым толькі права на годны заробак».

«А аб праве на жыццё дзіўна чуць ад Лукашэнкі, калі ў Беларусі выкарыстоўваецца смяротнае пакаранне. Мы адзіная краіна ў Еўропе і сярод пост-савецкіх краін, дзе яшчэ практыкуецца такі від пакарання», - адзначыў Валянцін Стэфановіч.

Нагадаем, сёння днём пачалася прэс-канферэнцыя беларускага дыктатара для расейскіх рэгіянальных СМІ. Лукашэнка заявіў, што ў нас «двое ці трое палітвязняў, якія «штурмавалі» Дом урада».

«Я лічу, што правы чалавека - гэта права на жыццё, гэта права на працу, на годны заробак», - сказаў кіраўнік.