Бішкек чакае «прамога адказу» з Менска

• 2.10.2012, 11:38

МЗС Кыргызстана чакае «прамога адказу» з Менска на афіцыйную ноту аб экстрадыцыі былога кіраўніка рэспублікі Курманбека Бакіева.

Пра гэта заявіў у аўторак на прэс-канферэнцыі начальнік Упраўлення інфармацыі, прэс-сакратар знешнепалітычнага ведамства Кыргызстана Нуржыгіт Кадырбекаў, піша «Інтэрфакс».

«Мы чакаем прамога адказу на наш афіцыйны зварот, які яшчэ не паступіў. Калі выказванні амбасадара Беларусі ў Казахстане адпавядаюць рэчаіснасці, то мы вельмі шкадуем, што крымінальныя пераследы і абавязацельствы па Менскай і Кішынёўскай канвенцыях СНД пераводзяцца ў палітычную плоскасць», - сказаў Кадырбекаў.

«Працэсы ўступлення Кыргызстана ў Мытны саюз і крымінальныя пераследы знаходзяцца ў рознай плоскасці і ніякага гандлю тут быць не можа», - падкрэсліў прадстаўнік МЗС.

Раней tengrinews.kz апублікавала інтэрв'ю з амбасадарам Беларусі ў Казахстане Валерыем Брылёвым, у якім ён заявіў, што «Беларусь не гатовая бачыць Кыргызстан у МС да ўрэгулявання палітычных пытанняў».

Ён таксама выказаў заклапочанасць у сувязі з нападамі на амбасаду Беларусі ў Бішкеку і адзначыў складанасці ў выдачы сваякоў Бакіева кыргызскім уладам.

Між тым Кадырбекаў паставіў пад сумнеў сапраўднасць выказванняў беларускага амбасадара, так як, па яго словах, «дадзенае паведамленне выйшла толькі ў адным СМІ».

Бакіеў і яго малодшы брат, экс-кіраўнік Службы дзяржаховы Жаныш Бакіеў абвінавачваюцца ў шэрагу злачынстваў. Яны знаходзяцца ў Беларусі, улады якой адмаўляюцца выдаць іх на радзіму.