Барыс Жаліба: Беларусі прыйдзецца прадаць нафтавыя прадпрыемствы
- 24.10.2012, 17:53
Уладзімір Сямашка зможа дамовіцца аб пастаўках нафты, толькі прыняўшы расейскія ўмовы прыватызацыі, лічыць эксперт.
«У гэтым квартале Расея на чвэрць скараціла пастаўкі нафты на нашы нафтаперапрацоўчыя заводы (НПЗ). Да Новага года час яшчэ ёсць, і першае, пра што будзе ісці гаворка на сустрэчы намесніка прэм'ер-міністра Беларусі Уладзіміра Сямашкі з віцэ-прэм'ерам урада РФ Аркадзем Дварковічам - павелічэнне паставак нафты», - распавёў сайту charter97.org беларускі эканаміст Барыс Жаліба.
Па словах эксперта, скарачэнне паставак нафты пагражае беларускаму рублю дэвальвацыяй. «Зніжэнне паставак на чвэрць - істотна для беларускай эканомікі. Скараціўся экспарт, сальда гандлёвага балансу стала адмоўным. Гэта пагражае курсу беларускага рубля, так як прыток валюты скараціўся. Нафтапрадукты прыносяць 30-40% ад прытоку валюты ў краіну. Як утрымаць курс да Новага года?».
Расея зменшыць пастаўкі нафты і ў наступным годзе, адзначыў Барыс Жаліба. «Другое, аб чым будзе ісці размова - баланс паставак нафты на ўвесь наступны год. Па гэтым пытанні бакі не маюць адзінага меркавання. Па балансе гэтага года Беларусь павінна атрымаць 23,5 мільёна тон нафты. Ці выйдзе Расея на гэтыя ж лічбы - не ведаю. З-за растваральнікавага бізнесу пастаўкі нафты скараціліся. Беларусь хоча мець 23,5 мільёна тон нафты і ў наступным годзе, але Расея пагадзіцца ў лепшым выпадку на 23. Паўмільёна - гэта вялікая лічба. Хоць Расея можа паставіць яшчэ менш».
Для стабільных паставак нафты Беларусі давядзецца зладзіць маштабную прыватызацыю, лічыць эканаміст. «Расея выставіць свае ўмовы - яны вядомыя і даўно агучаныя. Беларусь павінна будзе зладзіць прыватызацыю па ўмовах антыкрызіснага фонду ЕўрАзЭС на 2,5 мільярда даляраў, чаго яна не зрабіла. Таксама ўладам Беларусі трэба будзе быць згаворлівымі ў пытаннях продажу Расеі «Нафтана», другой частцы Мазырскага НПЗ і «Гроднаазота».
Нагадаем, 25 кастрычніка ў Маскве будзе знаходзіцца першы намеснік прэм'ер-міністра Беларусі Уладзімір Сямашка, дзе ён правядзе перамовы з віцэ-прэм'ерам урада РФ Аркадзем Дварковічам пра індыкатыўны баланс на чацвёрты квартал і на першы квартал наступнага года.