Рыхтуецца дыктатарская прыватызацыя

• 5.10.2012, 13:23

Пасля «парламенцкіх выбараў» улады рыхтуюць закрытую прыватызацыю буйных прадпрыемстваў.

Пра гэта заявіла кіраўніцтва Аб'яднанай грамадзянскай партыі.

Старшыня партыі Анатоль Лябедзька адзначыў, што да яго паступілі сігналы аб тым, што рыхтуецца прыватызацыя на ўмовах Аляксандра Лукашэнкі важных аб'ектаў беларускай прамысловасці і нацыянальнага багацця - так званая «сейфавая прыватызацыя». «Праз год-другі мы можам прачнуцца ў краіне, якая нам не належыць» - сказаў лідэр АГП.

Вызначэнне «сейфавая прыватызацыя» дадзена Лябедзькам у сувязі з тым, што Аляксандр Лукашэнка прапаноўвае інвестарам прыходзіць на тых умовах, якія знаходзяцца ў яго ў сейфе, перадае «Радыё Свабода».

Фактычна, па словах Анатоля Лябедзькі, плануецца раскрадванне агульнанароднай уласнасці з тым, каб дзейсны рэжым мог далей утрымлівацца ва ўладзе. У прыватнасці, ідзе гаворка пра тое, што ўлада створыць 30-35 холдынгаў, на чале якіх паставіць буйных бізнесменаў, блізкіх да Аляксандра Лукашэнкі, і аддасць ім усё добрыя актывы. «Гэта будзе цікавасць праўладных бізнесменаў і цікавасць Лукашэнкі».

«Другі варыянт таемнай прыватызацыі, пра якую мала каму будзе вядома, гэта прыватызацыя расейскімі, кітайскімі і іншымі алігархамі. Супраць гэтага трэба змагацца», - адзначылі кіраўнікі Аб'яднанай грамадзянскай партыі.

На думку лідэраў АГП, яны будуць звяртацца да незалежных прафсаюзаў, працоўных калектываў, дэпутатаў Вярхоўнага Савета 13-га склікання як апошняга легітымнага парламента з тым, каб агучыць пазіцыю ў гэтай сферы: «Здзелкі па продажу дзяржаўнай уласнасці, якія ажыццяўляюцца рэжымам Лукашэнкі, не адказваюць інтарэсам беларускага народа і не могуць лічыцца законнымі. Пасля непазбежнага падзення рэжыму яны будуць перагледжаны ў абавязковым парадку», - гаворыцца ў заяве Аб'яднанай грамадзянскай партыі з гэтай нагоды.

На думку лідэраў АГП, у выніку выбараў у «палату прадстаўнікоў» патрапілі толькі залежныя на 100% ад улады людзі, і яны не будуць пратэставаць супраць прыватызацыі, да якой рыхтуецца Аляксандр Лукашэнка і яго атачэнне.