Еўракамісія: Удзел Украіны ў МС несумяшчальны з еўраінтэграцыяй

• 26.12.2012, 9:56

Збліжэнне Украіны з Мытным саюзам і Пагадненне аб асацыяцыі Украіны-ЕЗ з'яўляюцца несумяшчальнымі, заяўляюць у Еўрапейскай камісіі.

Каментуючы агенцтву «Інтэрфакс-Украіна» магчымы сцэнар развіцця ў выпадку поўнай або частковай інтэграцыі Кіева з Мытным саюзам, у Еўракамісіі растлумачылі, што ў гэтым выпадку Украіна «павінна выбіраць, з якімі правіламі выраўноўваць сваё заканадаўства - з тым, якое звязана з заканадаўствам ЕЗ , або з тым, якое прымяняецца ў рамках Мытнага саюза».

«Немагчыма, каб Украіна выраўноўвала з абодвума (заканадаўствамі) у адзін і той жа час. Украіна павінна выбраць, якога шляху прытрымлівацца, ведаючы, што Мытны саюз і Пагадненне аб асацыяцыі Украіна-ЕЗ з'яўляюцца ўзаемна несумяшчальнымі», - заяўляюць у Брусэлі.

У Еўракамісіі канстатуюць, што «сцэнар поўнай інтэграцыі Украіны з Мытным саюзам створыць сур'ёзныя праблемы». «Украіна не зможа праводзіць і рэалізоўваць якую-небудзь самастойную двухбаковую гандлёвую палітыку, перадаўшы свой суверэнітэт Мытнаму саюзу па пытаннях у сферы тарыфаў і іншых ключавых камерцыйных пытаннях», - растлумачылі ў ЕК.

Акрамя таго, у Еўракамісіі таксама падкрэсліваюць, што «нават частковае далучэнне да Мытнага саюзу, якое ўплывае на ўкраінскія тарыфы ці яе нарматыўныя рамкі, звязаныя з гандлем, будзе праблематычным».

«У выніку, нягледзячы на складанасць пытанняў, якія будуць таксама вырашаныя ў кантэксце членства Украіны ў СГА, уступленне ў Мытны саюз паўплывае на прывілеяваныя гандлёвыя адносіны, на якія накіраваная паглыбленая і ўсёабдымная зона свабоднага гандлю з ЕЗ», - настойваюць у ЕК.

У Брусэлі нагадалі, што Пагадненне аб паглыбленай і ўсёабдымнай зоне свабоднага гандлю з Украінай накіраванае на «дасягненне поўнай і эфектыўнай гандлёвай інтэграцыі паміж двума рынкамі, падымаючы адпаведныя мытныя тарыфы і квоты, а таксама падаючы аснову для гарманізацыі заканадаўства, норм і правіл у розных гандлёвых сектарах».

«Пагадненне прапануе Украіне рамкі для мадэрнізацыі гандлёвых адносін і эканамічнага развіцця, якое станоўча адаб'ецца на эканамічных аспектах жыцця і прынясе перавагі зацікаўленым бакам», - падкрэсліваюць у Еўракамісіі.