Ермакова: А траншу ўсё няма
- 26.12.2012, 12:10
(абноўлена) АКФ ЕўрАзЭС да гэтага часу не пералічыў Беларусі 440 млн даляраў у рамках 4-га траншу стабілізацыйнага крэдыту.
Аб гэтым паведаміла сёння кіраўнік Нацбанка РБ Надзея Ермакова падчас анлайна на сайце БелТА.
«Сродкі чацвёртага траншу крэдыту АКФ ЕўрАзЭС паступяць у Беларусь у бліжэйшы час. У дадзены момант Еўразійскім банкам развіцця, які з'яўляецца кіраўніком сродкамі АКФ, праводзіцца тэхнічная работа па забеспячэнню пералічэння чацвёртага транша фінансавага крэдыту АКФ Рэспубліцы Беларусь. Пры гэтым для Рэспублікі Беларусь пытанне аб канкрэтнай даце паступлення сродкаў фінансавага крэдыту не з'яўляецца прынцыповым», - сказала Ермакова.
Рашэнне аб прадастаўленні Беларусі 4-га траншу было прынята 7 снежня 2012 года. Складанасці з пералікам грошай Беларусі ў АКФ увязваюць з неабходнасцю частковага пагашэння вэксаляў, выдадзеных дзяржавамі-заснавальнікамі фонду для выплаты сваіх унёскаў.
Ермакова таксама заявіла, што Беларусь вясной 2013 года разлічвае абмеркаваць з Міжнародным валютным фондам (МВФ) магчымасць рэалізацыі новай праграмы stand-by.
«Кіраўніцтва МВФ не адмаўляе магчымасць рэалізацыі новай праграмы. Аднак нам трэба будзе яшчэ зрабіць значную працу па выпрацоўцы і ўзгадненні ўмоў заключэння крэдытнай праграмы з фондам, з улікам інтарэсаў Беларусі, атрымання шырокай падтрымкі членаў савета дырэктараў. Мы плануем абмеркаваць з прадстаўнікамі фонду нашыя далейшыя дзеянні ў гэтым напрамку вясной 2013 года», - заявіла яна.
Адказваючы на пытанне журналістаў аб зарплаце, Ермакова адказала, што яе зарплата - каля $ 2 тысяч, аднак прыкладна палову сваёй заработнай платы яна аддае на дабрачыннасць.
На пытанне, як старшыня Нацбанка будзе эканоміць у Год беражлівасці, Ермакова адказала, што і так эканоміць.
- Я жыву адна, і для мяне не складае цяжкасцяў, каб на харчаванні зэканоміць. На вопратку я трачу крыху больш, каб выглядаць добра і народ не спужаўся, што старшыня Нацбанка дрэнна апранаецца, што няма краіне на што жыць. Гэта я так жартую.
Гаворачы аб магчымай дэвальвацыі, Ермакова запэўніла беларусаў: ніякай дэвальвацыі нацыянальнай валюты ў «трывожны» перыяд святаў не будзе.
«Святкуйце Новы год спакойна, - заявіла Ермакова. - Нягледзячы на тое, што Нацыянальны банк не ўстанаўлівае на 2013 год мэтавыя арыенціры па абменным курсе, чакаць яго рэзкага змены не варта. Асновай для ўстойлівасці валютнага рынку і абменнага курсу з'яўляецца ўнутраная і знешняя збалансаванасць эканомікі, на забеспячэнне якой, у сваю чаргу, накіраваная праца і ўрада, і Нацыянальнага банка».
Нагадаем, мінулы кіраўнік Нацбанка Пётр Пракаповіч таксама запэўніваў беларусаў напярэдадні трохразовай дэвальвацыі рубля, што яе не будзе.