Станіслаў Багданкевіч: Улады ўзаконьваюць дыктат у эканоміцы
- 4.12.2012, 15:01
Увядзеннем «залатой акцыі» улады ўзаконьваюць існае становішча рэчаў.
«Гэта адміністраванне, спроба ручнога кіравання эканомікай па-за дзеяння аб'ектыўных эканамічных законаў. Гэта тое, што называецца аўтарытарным дыктатарскім кіраваннем краінай, у тым ліку і эканомікай. Гэта спроба чыноўнікаў улезці ў бізнес, супраць чаго мы заўсёды выступалі», - распавёў сайту charter97.org былы старшыня Нацбанка Станіслаў Багданкевіч.
Па словах эканаміста, усе нашыя праблемы ў эканоміцы звязаныя з тым, што дзяржава ўмешваецца ў тую сферу, у якую ўмешвацца не варта:
«Відавочна наша нарастальнае адставанне ад усіх краін-суседзяў, не толькі ад Літвы і Польшчы, але нават ад Расеі і Казахстана - па ўсіх важнейшых параметрах эканомікі. І гэта выклікана як раз манапалізмам дзяржавы, адміністрацыйным кіраваннем і ўмяшаннем у тую сферу, якая павінна развівацца самастойна».
Увядзенне ўпаўнаважаных прадстаўнікоў дзяржавы ў акцыянерных таварыствах - толькі ўзаконьванне той практыкі, якая ўжо даўно ўжываецца, адзначыў эксперт:
«І без гэтага ідэалагічнага акта ў нас пастаянна было і ёсць ўмяшанне ў справы бізнесу. Зараз улады проста вырашылі ўзаконіць практыку, якая сёння існуе. Ідзе пастаяннае ўмяшанне і спроба ўвядзення нейкіх заданняў і нормаў у прыватны бізнэс. Гэта паглыбленне неэфектыўнасці эканомікі, узмацненне адставання па такіх напрамках, як прадукцыйнасць, рэнтабельнасць і іншым. Гэта тое, што ў нас ёсць і будзе яшчэ больш павялічвацца».
На думку Станіслава Багданкевіча, кіраванне нашай эканомікай не мае нічога агульнага з працай рынкавай эканомікі:
«Эканоміка нашых суседзяў развіваецца на аснове рынку. Рынак - гэта разумны сэнс і канкурэнцыя, а не ўказанні адміністрацыйных органаў улады, што вырабляць, якую рабочым плаціць зарплату, каму прадаваць тавары і па якім кошце».
Акрамя ўмяшання ў бізнес, улады ствараюць для яго ўмовы няроўнасці, падкрэсліў экс-кіраўнік Нацбанка:
«І акрамя таго, у нас няроўнасць у эканоміцы - адным даюць льготы ў выглядзе падаткаабкладання і нізкіх адсоткаў на крэдыты, а іншым забараняюць ці не даюць. Ёсць канстытуцыйны прынцып - аднолькавыя ўмовы развіцця для любых форм уласнасці. Але ён парушаецца пастаянна».
Пры дыктатуры рэформа эканомікі немагчымая, упэўнены эканаміст:
«Патрабуецца палітычная рэформа. Я ўвесь час кажу, што ніякія эканамічныя рэформы ва ўмовах Беларусі немагчымыя без першапачатковых або паралельных палітычных рэформаў. Патрэбны зварот нармальнай іерархіі закона - спачатку Канстытуцыя, потым закон, а ўжо пасля пастановы і ўказы. А ў нас сёння указам можна адмяніць закон аб бюджэце. Гэта абсурдна».
Нагадаем, Дзяржаўны камітэт па маёмасці (ДКМ) Беларусі падрыхтаваў праект указа аб ўладальніцкім наглядзе ў акцыянерных таварыствах (АТ), у тым ліку тых, дзе адсутнічае доля дзяржавы. Між тым, у ДКМ пакуль адмаўляюцца ад каментароў адносна шыраты паўнамоцтваў «упаўнаважанага». У прыватнасці, у ДКМ не каментуюць верагоднасць таго, што упаўнаважаны дзяржавы зможа аказваць уплыў на рашэнні выканаўчых органаў АТ.