За вядро локшыны на ганку БТ - штраф у 30 базавых

• 1.02.2012, 17:46

Непаўнагадовага Уладзіслава Лобава аштрафавалі на 30 базавых велічынь за ўдзел у акцыі 3 снежня каля будынку Белтэлерадыёкампаніі.

Да штрафу актывіста аргкамітэта па стварэнні Нацыянал-бальшавіцкай партыі прысудзіла адміністрацыйная камісія пры адміністрацыі Маскоўскага раёна Менска, піша ПЦ «Вясна».

Нагадаем, падчас акцыі трое маладых людзей выплюхнулі на ганак ля цэнтральнага ўваходу ў будынак Белтэлерадыёкампаніі вядро з локшынай і раскідалі ўлёткі. «Беларускае тэлебачанне заўсёды славілася адкрыта замоўнымі, палітычна ангажаванымі рэпартажамі, што выклікаюць і смех, і здзіўленне», - заявілі тады беларускія нацбалы.

Прадстаўнікі камісіі палічылі, што Уладзіслаў Лобаў прымаў удзел у гэтай акцыі і пакаралі яго штрафам па артыкуле 17.1 КаАП («Дробнае хуліганства»).