«Нашу Ніву» засудзілі

• 10.02.2012, 11:02

Газета «Наша ніва» павінная выплаціць 5 мільёнаў рублёў былому супрацоўніку тэлеканала АНТ Дзянісу Сухавараву ў якасці кампенсацыі маральнай шкоды.

Такое рашэнне прыняў суд Кастрычніцкага раёна Менска, паведамляе прэс-служба «Беларускай асацыяцыі журналістаў».

Дзяніс Сухавараў - той самы журналіст, які спачатку атрымаў ўзнагароду на конкурсе «Тэлевяршыня» за журналісцкае расследаванне «гульняманіі», а потым трапіў пад крымінальную справу нібыта за махінацыі з крэдытамі, якія, як сцвярджала следства, спускаў ў казіно і на гульнявых аўтаматах. Першы суд вынес Сухавараву прысуд у пяць гадоў з канфіскацыяй, але потым гэты прысуд быў абскарджаны і адменены, а сам Дзяніс Сухавараў - апраўданы.

За апісанне гэтай гісторыі на момант першага прысуду Сухавараў вырашыў судзіцца адразу з двума незалежнымі СМІ - агенцтвам БелаПАН і газетай «Наша Ніва», а таксама з журналістам Вячаславам Будкевічам. Тэлежурналіст абурыўся тым, што фігураваў у паведамленнях як «махляр», у той час як прысуд па ягонай справе яшчэ не ўступіў у законную сілу.

Цікава, што ў вышэйзгаданых паведамленнях інфармацыя падавалася са спасылкай на пракуратуру Менска і ГУУС Менгарвыканкама, але былы журналіст АНТ вырашыў выцягнуць маральную шкоду з калегаў. Ён патрабаваў, каб БелаПАН і «НН» абверглі распаўсюджаныя звесткі, і хацеў спагнаць з іх 50 мільёнаў рублёў.

Суд адхіліў пазоў да БелаПАН і В. Будкевіча, але часткова задаволіў яго ў дачыненні да «Нашай Нівы», прысудзіўшы ёй кампенсаваць маральную шкоду Дзянісу Сухавараву сумай у 5 мільёнаў беларускіх рублёў.

«Я не згодны з рашэннем суда. Не лічу, што газета «Наша Ніва» вінаватая перад грамадзянінам Сухаваравым, - пракаментаваў вынікі слуханняў галоўны рэдактар ​​выдання Андрэй Скурко. - Ягоныя гонар, годнасць і справавая рэпутацыя больш пацярпелі ад ягоных уласных дзеянняў, чым ад якіх бы там ні было публікацый... На момант публікацыі інфармацыя пра грамадзяніна Сухаварава ў рэчаіснасці адпавядала - яму быў вынесены прысуд. А слова «махляр» пазначала ягоны працэсуальны статус - «абвінавачаны ў махлярстве». Гэта не была маральная ацэнка ягоных дзеянняў».

Па словах Андрэя Скурко, рэдакцыя яшчэ не атрымала матывіровачнай часткі прысуду - яе абяцалі даслаць прыкладна праз тыдзень. «Убачыўшы яе, канчаткова вырашым, ці будзем аспрэчваць рашэнне суда», - заявіў галоўны рэдактар ​​«Нашай Нівы».