Сяргей Каваленка застаецца ў турэмным шпіталі

• 19.03.2012, 13:19

Алена Каваленка, жонка галадоўніка Сяргея Каваленкі, сустрэлася з начальнікам турмы на Валадарскага і з начальнікам медыцынскай часткі.

Яны паведамілі ёй, што стан Сяргея можна ахарактарызаваць як «сярэдняй цяжкасці». Але сказалі, што некаторыя працэсы, якія парушаюць здароўе, ужо пачаліся: Сяргею зараз цяжка рухацца, перадае «Радыё Свабода».

Алене Каваленка паведамілі, што шпіталяваць Сяргея ў грамадзянскую лякарню не будуць, бо ўсю неабходную дапамогу галадоўніку Каваленку яны могуць аказаць і ў межах турмы.

Стала вядома таксама, што Сяргея Каваленку не адправілі на медыцынскае абследаванне ў Навінкі, як планавалася раней. Зараз ён у Рэспубліканскай турэмнай лякарні.

Сёння а 14-й гадзіне адбудзецца сустрэча Сяргея Каваленкі з братам Віталём.

Разам з Аленай Каваленка і Віталём ў Менск прыехаў сямігадовы сын Сяргея Каваленкі Валік.