Аўтавакзал «Маскоўскі» усё ж такі знясуць

• 10.04.2012, 10:28

Менскія ўлады разважаюць над прапановай «Газпрама» аб будаўніцтве адміністрацыйнага будынка на месцы аўтавакзала «Маскоўскі».

«Такія прапановы ёсць. Зараз мы знаходзімся на стадыі перамоваў. Адкідваць іх (чуткі - ІФ) цалкам не трэба», - сказаў старшыня Менскага гарвыканкама Мікалай Ладуцька ў інтэрв'ю газеце «СБ. Беларусь сегодня», апублікаваным у аўторак, перадае «Інтэрфакс».

«Аўтавакзал «Маскоўскі» сёння загружаны менш чым на 60%. Гэта - не ключавое транспартнае ядро. Міжгароднія маршруты ў стане прыняць аўтавакзалы «Усходні» і «Цэнтральны», - адзначыў ён. «Што тычыцца прыгарадных напрамкаў, тое, каб не ўшчаміць інтарэсы пасажыраў, трэба толькі даабсталяваць аўтобусныя станцыі на вуліцах Карбышава і Русіянава. Гэта не так дорага», - працягнуў старшыня Менгарвыканкама.

«З пункту гледжання помніка архітэктуры - вакзал такім не з'яўляецца. Таму казаць пра тое, што знос «Маскоўскага» стане для горада вялікай стратай, нельга», - дадаў ён.

«Хай лепш там з'явяцца фешэнэбельныя адміністрацыйныя будынкі сучаснага выгляду, арэнднае жыллё, спартовыя аб'екты, гандлёвыя комплексы, транспартная развязка. Гэта створыць новы стымул для адкрыцця прадстаўніцтваў буйных замежных кампаній, банкаў, прыцягне дадатковыя фінансавыя плыні», - перакананы М.Ладуцька. «Мы павінныя прапаноўваць новыя магчымасці, каб Менск стаў буйным фінансавым, транспартным, культурным, забаўляльным, адукацыйным цэнтрам», - падкрэсліў ён.

Аўтавакзал «Маскоўскі» быў адкрыты для пасажыраў у жніўні 1999 года. На рэспубліканскім архітэктурным форуме «Брэст 99» будынак быў удастоены Гран-пры за лепшую пабудову года. У 2002 годзе будынак аўтавакзала прызнаны лепшым архітэктурным будынкам года.

Аўтавакзал з'яўляецца адным з найбуйных аўтавакзалаў ў Еўропе. Умяшчальнасць будынка аўтавакзала складае 600 пасажыраў, сутачная прапускная здольнасць - 6 тыс. пасажыраў. Прызначаныя перавозкі Маскоўскага і Віцебскага адпраўленняў. Аўтавакзал абслугоўвае каля 30% агульнай колькасці пасажыраў у прыгарадных зносінах.

Па дадзеных «Менсктранса», штодня ад аўтавакзала «Маскоўскі» адпраўляецца 240 аўтобусаў у прыгарадных зносінах, 120 у міжгароднім паведамленні 10 у міжнародных зносінах, паслугамі аўтавакзала карыстаюцца 3,2 тыс. пасажыраў за дзень.