Алега Волчака вінавацяць у «антысанітарыі»

• 26.04.2012, 14:42

Праваабаронца можа апынуцца фігурантам адміністрацыйнай справы за выкід смецця пад Вілейкай.

Алегу Волчаку пагражае штраф у 13 мільёнаў рублёў, піша «Беларускі партызан».

«Учора мне патэлефанаваў старшыня Вязыньскага сельсавета і сказаў, што ў дачыненні да мяне, магчыма, будзе складацца адміністрацыйны пратакол за выкід бытавога смецця ў неўсталяваным месцы паміж населеным пунктам Вілейка - Ілля (Менская вобласць).

Я пацікавіўся, а чаму яны лічаць, што гэта я зрабіў? У адказ пачуў, што там раскідана шмат улётак з маімі каардынатамі і майго юрыста Анатоля Папова са Жлобіна. Акрамя таго, ім было сказана, што там выкінутыя старыя рэчы, нейкія дываны, былыя ва ўжыванні, стары абагравальнік і іншае смецце. Мне прапанавалі прыбраць, а калі я не прыбярэм, то яны будуць звяртацца ў райаддзел міліцыі для правядзення праверкі па дадзеным факце. Я растлумачыў, што да гэтага смецця ніякага дачынення не маю. Я мяркую, што гэта зроблена наўмысна, з мэтай прыцягнуць мяне да адміністрацыйнай адказнасці. У гутарцы было заяўлена, што, калі такі пратакол будзе складзены, то штраф - 130 базавых велічынь. На сёння гэта 13 мільёнаў рублёў. Думаю, гэта зроблена, каб павесіць на мяне шкоду, і гэта будзе падставай для забароны выезду з краіны, пакуль я не аплачу штраф.

Як мне стала вядома па маіх каналах, у Міністэрстве юстыцыі не было ніякай інфармацыі аб тым, што ў дачыненні да мяне вядзецца які-небудзь грамадзянскі працэс, але разам з тым, паводле нечай каманды мяне ўнеслі ў спіс для забароны выезду з Беларусі. Таму, каб апраўдаць сваё незаконнае рашэнне аб унясенні мяне ў гэты спіс, у які я трапіў 5 сакавіка 2012 года, улада плануецца пачаць такі «смеццевы» псеўдапрацэс. Сёння Міністэрства юстыцыі павіннае мне даць адказ, на якой падставе я быў унесены ў гэты спіс, вось таму паспешна супраць мяне ўлады пішуць новы адміністрацыйны працэс.

Я стэлефанаваўся з Анатолем Паповым, які сказаў, што гэта правакацыя, паколькі нашыя інфармацыйна-прававыя бюлетэні не могуць у такой колькасці валяцца на сметніку, бо такія друкаваныя выданні заўсёды карыстаюцца попытам у насельніцтва.

Мы ўжо ў 2004 годзе праходзілі такую аналагічную правакацыю, калі на «выбарах у парламент» пад маім імем былі ўкінутыя ўлёткі, у якіх Аляксандр Лукашэнка абвінавачваўся ў карупцыі, у забойстве апазіцыйных палітыкаў і ў іншых злачынствах. Што пазней паслужыла падставай зняць мяне датэрмінова з «выбараў». Нягледзячы на тое, што мы ўсталявалі асобу, якая ажыццявіла дадзеную правакацыю, пракуратура Цэнтральнага раёна Менска адмовілася прыцягваць правакатара да крымінальнай адказнасці.

Вядома, мы будзем разбірацца, што там за ўлёткі на сметніку. Але, відавочна, што такія дробныя поскудзі пэўных структур, вядома, будуць нас адцягваць ад паўсядзённай праваабарончай працы. Але мы даўно прывыклі да такой «апецы» з боку спецслужбаў. Праца наша будзе працягвацца», - заявіў Алег Волчак.