Урад: Беларусу хопіць 90 даляраў на месяц

• 27.04.2012, 10:21

У Беларусі зацверджаны новы бюджэт пражытачнага мінімуму.

Аб гэтым паведамляе БелТА са спасылкай на Міністэрства працы і сацыяльнай абароны.

Пастановай Савета міністраў № 387 ад 26 красавіка гэтага года зацверджаны бюджэт пражытачнага мінімуму ў сярэднім на душу насельніцтва і па асноўных сацыяльна-дэмаграфічных групах у коштах сакавіка 2012 года ў разліку на адзін месяц. Перыяд дзеяння гэтых сацыяльных нарматываў - з 1 мая па 31 ліпеня бягучага года.

Бюджэт пражытачнага мінімуму ў сярэднім на душу насельніцтва з мая складзе 743 020 рублёў. Новы БПМ павысіўся на 5,1% да нарматыву, які дзейнічае з 1 лютага па 30 красавіка 2012 года (было 706 880 рублёў).

Для працаздольнага насельніцтва БПМ усталяваны ў памеры 809 440 рублёў, для пенсіянераў - 610 370 рублёў, для дзяцей ва ўзросце да 3 гадоў - 641 890 рублёў, для дзяцей ва ўзросце ад 3 да 6 гадоў - 792 700 рублёў, для дзяцей ва ўзросце ад 6 да 18 гадоў - 831 170 рублёў, для дзяцей-студэнтаў - 758 530 рублёў.

Бюджэт пражытачнага мінімуму прадстаўляе сабой вартасную велічыню мінімальнага набору матэрыяльных даброт і паслуг, неабходных для забеспячэння жыццядзейнасці чалавека і захавання ягонага здароўя, а таксама абавязковыя плацяжы і ўнёскі.

Паколькі новы БПМ павысіўся на 5,1%, адпаведна з мая на 5,1% ўзрастаюць памеры дзяржаўных дапамог сем'ям, якія выхоўваюць дзяцей. Павялічаныя памеры сацыяльных пенсій, а таксама надбаўкі і павышэнні, усталяваныя да пенсій асобных катэгорый пенсіянераў.

Па словах спецыялістаў, структура бюджэту пражытачнага мінімуму ў сярэднім на душу насельніцтва ў коштах сакавіка 2012 года паводле артыкулаў выдаткаў наступная: прадукты харчавання - 56,4% (каля 420 000 рублёў), плата за карыстанне жылым памяшканнем і камунальныя паслугі - 7,6% (56 000 рублёў), прадметы гардэроба - 22,1% (164 000 рублёў), тавары бытавога і гаспадарчага прызначэння - 5% (37 000 рублёў), прадметы першай неабходнасці, санітарыі і лекі - 2,7% (20 000 рублёў) , бытавыя і транспартныя паслугі - 5% (37 000 рублёў), унёскі і плацяжы - 1,2% (9000 рублёў).

Бюджэт пражытачнага мінімуму штоквартальна зацвярджаецца ўрадам у коштах апошняга месяца кожнага квартала. У адпаведнасці з законам «Аб пражытачным мінімуме ў Рэспубліцы Беларусь» БПМ прызначаны для аналізу і прагназавання ўзроўню жыцця насельніцтва, аказання дзяржаўнай сацыяльнай дапамогі малазабяспечаным грамадзянам (сем'ям), абгрунтавання мінімальных дзяржаўных сацыяльна-працоўных гарантый.

Бюджэт пражытачнага мінімуму для працаздольнага насельніцтва прымяняецца для вызначэння сумы ўтрымання сродкаў з наймальнікаў, якія маюць запазычанасць па выплаце заработнай платы, і базавага межавага нарматыву тарыфнай стаўкі першага разраду для камерцыйных арганізацый дзяржаўнай формы ўласнасці і з доляй уласнасці дзяржавы ў іх маёмасці.