Дайце дзве
- 3.04.2012, 11:36
Лукашэнка гатовы будаваць у Беларусі не адну, а дзве АЭС.
Беларусь гатовая да будаўніцтва другой АЭС, заявіў Аляксандр Лукашэнка сёння на сустрэчы з генеральным дырэктарам Міжнароднага агенцтва па атамнай энергіі (МАГАТЭ) Юкіа Амана.
«Калі будзе вашае садзейнічанне, падтрымка і адпаведныя ўмовы, мы гатовыя і другую атамную станцыю пабудаваць у Беларусі», - сказаў дыктатар.
«Мы вельмі спадзяемся, што спадар Амана, як і папярэднія кіраўнікі гэтага агенцтва, акажа нам сур'ёзную маральную падтрымку ў будаўніцтве АЭС», - адзначыў Лукашэнка.
Ён сказаў, што «мы перажываем асаблівы перыяд у развіцці мірнага атама, асабліва пасля вядомых падзей у вас на радзіме і праблем з АЭС «Фукусіма», і наступнай рэакцыяй ў свеце пасля гэтай катастрофы». «Я маю на ўвазе намеры Германіі і іншых краін згарнуць ядзерныя праекты», - растлумачыў ён.
Таму, працягнуў ён, «у гэты асаблівы перыяд мы цвёрда і адназначна заяўляем аб тым, што мы не проста маем намер пабудаваць АЭС, але і пачалі яе будаўніцтва». «Я мяркую, што МАГАТЭ - арганізацыя, якая вельмі зацікаўленая ў тым, каб падобныя, вядома ж, бяспечныя праекты ў свеце рэалізоўваліся», - заявіў А.Лукашэнка.
Па ягоных словах, «трэба мець на ўвазе, што дадзенае будаўніцтва (АЭС у Беларусі - ІФ) адбываецца у краіне, якая найбольш сур'ёзна пацярпела ад Чарнобыльскай станцыі». «І тое, што сёння насельніцтва, а нам атрымалася гэта зрабіць, падтрымлівае гэты праект, вельмі сімптаматычна. І гэта вельмі важны фактар для працы МАГАТЭ ў Беларусі», - адзначыў ён.
«Я цвёрда перакананы, што ядзернай энергетыцы - быць, перакананы, што гэта найбольш бяспечная сфера і найбольш бяспечны шлях атрымання таннай энергіі, у якой свет усё больш будзе мець патрэбу», - адзначыў дыктатар.
У сваю чаргу Ю.Амана заявіў, што «Беларусь з'яўляецца вельмі важным партнёрам МАГАТЭ», паколькі рэспубліка мае сумны досвед у сувязі з чарнобыльскай катастрофай. «І тое, што вы зараз плануеце пабудаваць АЭС», - дадаў кіраўнік МАГАТЭ.
Ю.Амана адзначыў, што аварыя на АЭС «Фукусіма» «сур'ёзна падарвала давер людзей да атамнай энергетыкі». «Некаторыя краіны вырашылі ўстрымацца ад выкарыстання атамнай энергіі надалей. Але некаторыя краіны вырашылі працягваць выкарыстоўваць атамную энергетыку», - сказаў кіраўнік МАГАТЭ.
Кіраўнік агенцтва звярнуў увагу на тое, што «праблема забеспячэння фізічнай аховы ядзерных аб'ектаў застаецца сур'ёзнай», у тым ліку ў сувязі са зменлівым кліматам.
«Кожная краіна мае патрэбу ў развіцці энергетыкі, паляпшэнні жыцця насельніцтва, таму рашэнне аб выкарыстанні атамнай энергіі з'яўляецца вельмі важным», - падкрэсліў генеральны дырэктар МАГАТЭ.