Настаўнікаў прымушалі ўсміхацца Козіку

• 17.05.2012, 11:27

Перад візітам Козіка ў Мікашэвічы настаўнікаў пад пагрозай звальнення «папрасілі» ўсміхацца і казаць, што ўсё добра.

16 мая Мікашэвічы наведала дэлегацыя прадстаўнікоў Федэрацыі прафсаюзаў Беларусі на чале са старшынём Леанідам Козікам.

Ніякай інфармацыі ў прэсе аб гэтым візіце ў Мікашэвічы Леаніда Козіка і ягоных калегаў не было. Аднак кіраўнікоў прадпрыемстваў і ўстановаў адукацыі ў Мікашэвічах пра прыезд дэлегацыі папярэдзілі загадзя, каб яны змаглі даць указанні сваім работнікам.

Ніна Адамаўна, настаўніца адной са школ распавяла «Беларускім рэгіянальным навінам»:

- Сёння ранкам адбылася вытворчая нарада, на якой дырэктар школы паведаміла нам пра прыезд прафсаюзнай дэлегацыі і беларускага тэлебачання, прасіла ўсміхацца і казаць, што ўсё добра. Ніякіх скаргаў ці просьбаў. Дэлегацыя-та паедзе, праблемы застануцца. Незадаволеных абяцалі сурова пакараць, ажно да звальнення!

Жыхары Мікашэвічаў лічаць, што госці прыехалі ў сувязі з гучнымі падзеямі на РУВП «Граніт». Нагадаем, у пачатку мая прайшла інфармацыя пра тое, што больш за 400 працоўных «Граніту» напісалі заявы аб звальненні ў сувязі з нізкім узроўнем заробкаў. Крыху пазней галоўны інжынер прадпрыемства Эдуард Гаўрылковіч паведаміў БелаПАНу, што дадзеная інфармацыя не адпавядае рэчаіснасці.