Сірыя хоча ў Мытны саюз?

• 23.05.2012, 11:20

Сірыя вядзе перамовы аб далучэнні да пагаднення аб зоне вольнага гандлю ў межах Мытнага саюза Расеі, Беларусі і Казахстана.

Аб гэтым сёння паведамілі сірыйскія афіцыйныя СМІ, перадае «Інтэрфакс».

У Маскве напярэдадні стартавала паседжанне расейска-сірыйскай міжурадкамісіі (МУК) па гандлёва-эканамічным і навукова-тэхнічным супрацоўніцтве.

Паводле сірыйскіх СМІ, камісія сярод іншага абмяркуе шляхі пашырэння тавараабароту ў межах перамоў аб далучэнні Сірыі да пагаднення аб зоне вольнага гандлю Мытнага саюза.

Сірыйскія СМІ адзначаюць, што дэлегацыю з Дамаска на паседжанні ўзначальвае міністр фінансаў Мухамад Аль-Жлейлаці. Сустаршынём МУК з расейскага боку з'яўляецца віцэ-прэм'ер Аляксандр Хлапонін.

У інтэрв'ю сірыйскім СМІ міністр фінансаў паведаміў, што ў Маскве бакі абмяркуюць пытанні пашырэння двухбаковага супрацоўніцтва і стварэння сумесных прадпрыемстваў у сферы электраэнергетыкі, нафтагазавай прамысловасці, распрацоўкі мінеральных рэсурсаў і сельскай гаспадаркі.

Плануецца таксама абмеркаваць пытанні ўдзелу расейскіх прадпрыемстваў у рэалізацыі ў Сірыі праектаў у галіне тэлекамунікацый.