«Беларуськалій» верне расейскі крэдыт датэрмінова

• 8.05.2012, 12:34

ААТ «Беларуськалій» плануе датэрмінова вярнуць сіндыкаваны крэдыт у 1 мільярд даляраў.

Аб гэтым паведамляе БелТА са спасылкай на крыніцу ва ўрадзе Беларусі.

У лістападзе 2011 года ў Менску было падпісанае крэдытнае пагадненне аб прыцягненні сіндыкаванага крэдыту Ашчадбанка Расеі і Еўразійскага банка развіцця (ЕАБР) у памеры $1 млрд. для ААТ «Беларуськалій» тэрмінам на адзін год. Доля Ашчадбанка Расеі ў крэдыце складае $900 млн., ЕАБР - $100 млн.

Беларускі ўрад прадаставіў гарантыю ААТ «Ашчадны банк Расеі» і Еўразійскаму банку развіцця ў пагашэнні сіндыкаванага крэдыту ў памеры $1 млрд., выдадзенага «Беларуськалію» на агульнакарпаратыўныя мэты, а таксама ў выплаце адсоткаў і іншых плацяжоў за карыстанне гарантаваным пазыкай.

Агульнакарпаратыўныя мэты, на якія «Беларуськалію» быў вылучаны крэдыт, уключаюць набыццё акцыянерным таварыствам акцый уласнага выпуску, любых каштоўных папер, аблігацый або даўгавых абавязальніцтваў, выпушчаных або гарантаваных Беларуссю (гарантаваная пазыка).

БПС-Ашчадбанку прадастаўленыя паўнамоцтвы па абслугоўванні гарантаванай пазыкі.