ЦВК больш не дасць апазіцыі прамога эфіру

• 28.06.2012, 15:46

Цэнтрвыбаркам Беларусі лічыць немэтазгодным праводзіць тэледэбаты кандыдатаў у дэпутаты беларускага «парламента» у прамым эфіры.

«У прамым эфіры мы ўжо правялі адныя тэледэбаты (кандыдатаў у прэзідэнты краіны ў 2010 годзе - ІФ). Прыемнага вельмі мала там было. Мы спадзяемся, што дэбаты на «парламенцкіх выбарах» будуць праходзіць ветліва і ў карэктнай форме, але ўсё ж будзем трансляваць іх у запісу», - паведаміў «Інтэрфакс-Захад» у чацвер сакратар Цэнтрвыбаркама Беларусі Мікалай Лазавік.

Пры гэтым ён адзначыў, што «правядзенне дэбатаў кандыдатаў у дэпутаты «палаты прадстаўнікоў» - гэта для нас справа новая». «Мы яшчэ не праводзілі тэледэбаты для кандыдатаў у дэпутаты «парламента». Былі толькі тэледэбаты кандыдатаў у прэзідэнты», - растлумачыў М.Лазавік.

«Лічым, што час трансляцыі гэтых дэбатаў павінны быць такім жа рэйтынгавым, як і час трансляцыі перадвыбарных выступленняў», - падкрэсліў сакратар ЦВК.

Нагадаем, што падчас прэзідэнцкай выбарчай кампаніі ў 2010 годзе тэледэбаты кандыдатаў трансляваліся ў прамым эфіры. Амаль усе кандыдаты ў прэзідэнты заклікалі выбаршчыкаў выйсці на плошчу ў выпадку фальсіфікацыі вынікаў прэзідэнцкіх выбараў.