«Камуналка» зноў даражэе

• 10.07.2012, 12:07

Тарыфы на жыллёва-камунальныя паслугі ў Беларусі да канца 2012 года плануецца павысіць.

Аб гэтым паведаміў сёння журналістам намеснік міністра жыллёва-камунальнай гаспадаркі Анатоль Шагун.

Урад вызначыў тарыфную палітыку на 2012 год у разліку павышэння коштаў нібыта на $5 для стандартнай двухпакаёвай кватэры з трыма прапісаннымі чалавекамі. Зыходзячы з гэтага, можна вызначыць, што ў тым жа дыяпазоне трэба чакаць павышэння тарыфаў на жыллёва-камунальныя паслугі да канца года, адзначыў Анатоль Шагун.

Пры гэтым ён не назваў канкрэтныя тэрміны магчымага павышэння, хоць няма сумневаў, што $5 яно хутчэй за ўсё не абмяжуецца.

Намеснік міністра таксама паведаміў, што па дзеючых з 1 чэрвеня тарыфах пакрыццё выдаткаў насельніцтвам жыллёва-камунальных паслуг складае ў сярэднім 15%. Электраэнергія і газ у гэты паказчык не ўваходзіць, удакладніў ён.