Лукашэнка на сустрэчы з Мядзведзевым: «Ёсць маса праблем»
- 18.07.2012, 14:07
У Менску праходзіць сустрэча Аляксандра Лукашэнкі з прэм'ер-міністрам Расеі Дзмітрыем Мядзведзевым.
У пачатку сустрэчы беларускі дыктатар заявіў аб неабходнасці далейшага будаўніцтва «саюзнай дзяржавы» з Расеяй, перадае «Інтэрфакс».
«Нашаму галоўнаму праекту - «саюзнай дзяржаве»- мы будзем надаваць не толькі ўвагу, але і даваць ход гэтаму праекту», - заявіў А.Лукашэнка.
Кіраўнік адзначыў, што беларускі бок «гатовы да размовы па ўсіх пытаннях». «Мы гатовы абмеркаваць перспектывы саюзнага будаўніцтва, пытанні ў сферы абароны, фінансаў. І з улікам тых неспрыяльных тэндэнцый, якія насоўваюцца на нас з вамі ні то з Захаду, ні то з Поўдня, з усіх канцоў», - сказаў А.Лукашэнка. Паводле яго слоў, «ёсць маса праблем, якія трэба было б узгадніць».
А.Лукашэнка падзякаваў Д.Мядзведзева за тое, што ён стрымаў «сваё слова прыехаць у Беларусь у гэты дзень». «Ёсць, сапраўды, пра што пагаварыць. Ёсць праблемы і пытанні стратэгічнага характару», - сказаў ён.
«Вы пачынаеце сваё «старое-новае» жыццё ў палітыке з Беларуссю (на пасадзе прэм'ер-міністра РФ - ІФ), правядзеннем вельмі важнага мерапрыемства», - сказаў А.Лукашэнка, звяртаючыся да Д.Мядзведзева. «Мы надавалі і будзем надаваць вялікую ўвагу інтэграцыйным працэсам», - заявіў ён.
У сваю чаргу Дзмітрый Мядзведзеў адзначыў новы ўзровень узаемадзеяння Масквы і Менска.
«За апошні год, можа быць ледзь больш, мы прайшлі вельмі важны шлях і выйшлі на зусім іншы ўзровень стратэгічнага партнёрства, які не можа не радаваць і нас у Расеі, і, спадзяюся, і ў Беларусі такія ж настроі», - сказаў Д. Мядзведзеў.
Ён адзначыў, што выхад на новы ўзровень супрацоўніцтва Масквы і Менска пацвярджаецца і цалкам канкрэтнымі лічбамі, якія паказваюць, што бакі працавалі і працуюць не дарма.
«Ёсць цалкам канкрэтныя лічбы, якія пацвярджаюць, што мы працавалі не дарма, і працуем зараз, нават ва ўмовах напружанай фінансавай сітуацыі. Гандлёвы абарот паміж нашымі краінамі выйшаў на беспрэцэдэнтны ўзровень, такога гандлёвага абароту ніколі не было, гэта і вынік сумеснай дзейнасці, і інтэграцыйных працэсаў - я маю на ўвазе і ў рамках «саюзнай дзяржавы», і вядома ў рамках Мытнага саюза», - падкрэсліў расейскі прэм'ер.
Ён адзначыў, што на сённяшнім пасяджэнні Саўміна «саюзнай дзяржавы» трэба будзе абмеркаваць увесь парадак двухбаковых адносін - эканамічнае супрацоўніцтва, узаемадзеянне ў сферы абароны і гуманітарнай вобласці.
«У цэлым, лічу, што нашы адносіны знаходзяцца зараз на вельмі добрым узроўні. Ёсць паразуменне практычна па абсалютнай большасці пытанняў, але ёсць і пытанні, якія заўсёды варта абмяркоўваць. Гэтаму мы прысвяцім сённяшні кароткі, але насычаны дзень», - сказаў кіраўнік расейскага ўрада.