Міліцыянты пагражалі «закапаць» бяздомнага гамяльчаніна
- 25.07.2012, 21:21
Міхаіл Сцельчэня быў затрыманы і збіты за тое, што прасіў міласціну.
Гомельскі бяздомны Міхаіл Сцельчэня з дапамогай праваабаронцы, сябра Беларускага Хельсінкскага камітэта Марыі Багдановіч напісаў заяву начальніку Цэнтральнага РАУС Гомеля, у якой паведаміў аб беспадстаўным збіцці яго міліцыянтамі, перадае БелаПАН.
Раней Багдановіч станавілася сведкай жорсткага абыходжання міліцыі з бяздомнымі. На гэтую праблему яна звяртала ўвагу кіраўніцтва міліцыі і пракуратуры, адзначаючы, што міліцыянты адганяюць ад Петрапаўлаўскага сабора ў Гомелі просьбітаў міласціны. З пракуратуры Цэнтральнага раёна быў дадзены адказ, што прасіць міласціну законам не забараняецца, калі пры гэтым не парушаецца грамадскі парадак. Адказ пракурора праваабаронца накіравала міліцэйскаму кіраўніцтву і папрасіла правесці сярод асабовага складу тлумачальную працу з мэтай недапушчэння пераследу бяздомных.
«Праблема просьбітаў міласціны мае працяг: зараз мне стала вядома аб факце фізічнага гвалту з боку міліцыянтаў у дачыненні да чалавека, які збірае міласціну. Я думаю, ва ўладных колах наяўнасць просьбітаў міласціны ў цэнтральным парку, каля сабора, выклікае раздражненне, і яны ціснуць на міліцыю, каб гэтая праблема вырашалася любой цаной», - заявіла Багдановіч.
Міхаіл Сцельчэня адзначыў, што, калі ён прасіў міласціну каля сабора, да яго падышлі міліцыянты і прапанавалі прайсці ў апорны пункт. «Сталі хапаць мяне, пагражаць, што «завязем у лес і закапаем». Людзі заступіліся за мяне: маўляў, чаго вы яго забіраеце, ён цвярозы, ціхі, нікому не замінае. Я баяўся ехаць з імі ў «апорку», так як усе бяздомныя казалі, што там моцна б'юць. У выніку мяне завезлі на аўтамабілі ў апорны пункт і сказалі, што, маўляў, тут можаш крычаць, усё роўна цябе ніхто не пачуе. Адзін з міліцыянтаў пабіў мяне дубінкай па руках, нагах і галаве. Потым яны прымусілі напісаць мяне тлумачальную, што я быў п'яны, хоць я быў цвярозы. Я баяўся, так як яны сказалі: калі не напішаш паперу, то мы цябе наогул моцна паб'ём або завязем ў ІЧУ, таму падпісаў», - патлумачыў Сцельчэня.
Паводле слоў бяздомнага, яго б'юць у аддзеле не першы раз. «Раней прымушалі туалет мыць, я адмовіўся, так яны выламалі мне палец, тры месяцы хварэў. І іншых бяздомных б'юць - каму галаву адбілі, каму ныркі», - сказаў заяўнік.
Ён сумняваецца, што хтосьці разбярэцца з яго заявай і пакарае вінаватых. «Баюся, мяне наогул закапаюць», - падагульніў Сцельчэня.