У Беларусі і Ісусу жыць не даюць

• 9.07.2012, 14:37

Будслаўскага паломніка затрымалі за майку з надпісам «Няхай жыве Хрыстос Валадар».

Супрацоўнікі міліцыі затрымалі на Будслаўскім Фестывалі глыбоцкага паломніка Уладзіміра. Міліцыянты звярнулі на яго ўвагу з-за футболкі з выявай святара-пакутніка Мечыслава Багаткевіча і надпісам «Няхай жыве Хрыстос Валадар».

Уладзімір распавёў, што яго затрымалі, калі ён праходзіў турнікеты на шляху з намётавага мястэчка да касцёла. Міліцыянты патлумачылі, што ім «не падабаецца» яго футболка і завялі ў пастарунак.

Там нейкі міліцэйскі начальнік 15 хвілін размаўляў з паломнікам. Пытаў, дзе і па якой цане купіў майку, хто такі ксёндз Багаткевіч, і ці не азначае гэта футболка прыналежнасць да якой-небудзь арганізацыі. Пасля размовы пілігрыма ўсё ж адпусцілі.

Як паведамляе сайт westki.info, у мінулыя гады міліцыянты таксама затрымлівалі ні за што ўдзельнікаў Будслаўскага Фестывалю.

Мечыслаў Багаткевіч (1904-1942) - каталіцкі святар-пакутнік. Падчас нямецкай акупацыі служыў у Дрысе (Верхнядзвінску), дзе быў арыштаваны супрацоўнікамі гестапа. Расстраляны 4 сакавіка 1942 года ў лесе Барок каля Глыбокага разам са святарамі Уладзіславам Мацькавяком і Станіславам Пыртаком. Перад расстрэлам святары разам выкрыкнулі «Няхай жыве Хрыстос Валадар». Тата Ян Павел II ў 1999 годзе абвясціў блаславёнымі расстраляных у Барках святароў.

Нагадаем, што ў гэтым годзе ўрачыстасці ў гонар Маці Божай у Будславе пачаліся з пратэсту супраць жорсткага прапускнога рэжыму, уведзенага міліцыяй. Паломнікі з Віцебскай епархіі падышлі да турнікетаў, прыхіліліся, памаліліся, разгарнуліся і пайшлі.

Працэдура прымусовага ператрусу рэчаў была ўведзена тры гады таму. З кожным годам яна становіцца ўсё больш жорсткай - у гэтым годзе да спісу забароненых рэчаў былі дададзены парасоны. Каталіцкія святары лічаць, што гэта мэтанакіраванае прыніжэньне вернікаў з боку ўлады. Шматлікія вернікі перасталі ездзіць на Будслаўскі фэстываль, каб не праходзіць працэдуру зневажальнага ператрусу.