Надзея Астапчук: Мяне шантажавалі допінг-кантролем
- 14.08.2012, 9:35
З'явіліся першыя версіі, як забаронены прэпарат трапіў у арганізм алімпійскай чэмпіёнкі.
У інтэрв'ю «Прессболу» Надзея Астапчук заявіла, ёй даўно абяцалі праблемы з допінг-кантролем.
- Як часта цябе тэставалі перад Алімпійскімі гульнямі?
- Пачынаючы з красавіка, мяне бесперапынна трэслі антыдопінгавыя агенцтвы. Напрыклад, у траўні здавала тэсты двойчы, у чэрвені - тройчы, у ліпені - двойчы. Апошні раз - 30 ліпеня. Усе тэсты былі адмоўнымі.
- Застаецца выказаць здагадку, што допінг трапіў у твой арганізм паміж апошнім тэстам ў Менску і першым у Лондане ...
- Выходзіць так. Але вы ўяўляеце, што трэба страціць розум, каб наесціся допінгу перад самым выездам у Лондан, ведаючы, што там чакае абавязковы допінг-кантроль. Трэба быць сабе ворагам.
- Але ж нехта можа быць зацікаўлены ў тым, каб цябе падставіць?
- Той чалавек, вы ведаеце, пра каго я кажу, той, які займаўся шантажом, ён мне даўно абяцаў: у цябе будуць праблемы з допінг-кантролем. Зараз я думаю, што яго пагроза пачынае спраўджвацца, хоць ён ужо не працуе ў нас.
- Што ўсё ж такі збіраешся рабіць?
- Мы з Аляксандрам Яфімавым паспрабуем расследаваць гэтую справу, у тым ліку з дапамогай следчых органаў. Трэба прадумаць усё да дробязяў, успомніць усе гэтыя дні паміж 30 ліпеня і 5 жніўня: як яны праходзілі, дзе і з кім мела зносіны.
- А, дарэчы, дзе ты знаходзілася перад ад'ездам?
- Да 3 жніўня была на зборы ў Раўбічах, а 4-га мы з трэнерам вылецелі ў Лондан... Усё, што атрымаецца даведацца ў выніку расследавання, стане вядома ўсім. Мне няма чаго хаваць ад людзей. Я патраціла шмат сіл, каб стаць алімпійскай чэмпіёнкай, мне няма за што апраўдвацца. Не хачу так заканчваць спартыўную кар'еру.
Перад Алімпіядай у Лондане Надзея Астапчук у інтэрв'ю рэзка выказалася аб метадах кіравання былога галоўнага трэнера нацыянальнай каманды па лёгкай атлетыцы Анатоля Бадуева, які знаходзіцца цяпер пад арыштам.
У прыватнасці, Астапчук заўважыла: «Ранейшы галоўны трэнер успамінаў пра мяне толькі для таго, каб папрасіць выступіць на топ-турніры. Калі мы з Аляксандрам Мікалаевічам Яфімавым звярталіся з нейкай просьбай, у адказ чулі пустыя абяцанні. Не кажучы ўжо пра дробныя пакасці, якія даводзілася цярпець... Чым ён наогул займаўся? Дзе гэта бачана, каб галоўны трэнер стаяў на раздачы маек, трусоў і спартыўнага харчавання?! Няўжо ў федэрацыі ніхто не здольны гэта зрабіць?! Мне думаецца, галоўнакамандуючы павінен разам з асабістымі настаўнікамі выбудоўваць і кантраляваць трэніровачны працэс, хутка вырашаць пытанні, якія ўзнікаюць. Спартсменам трэба ведаць, што ёсць на каго абаперціся, у каго атрымаць падтрымку і савет. Мы хочам адчуваць сябе абароненымі, а не пастаянна чакаць подласці ад тых, хто павінен нам дапамагаць».
Нагадаем, учора стала вядома, што беларускую спартсменку пазбавілі залатога алімпійскага медаля з-за станоўчага тэсту на допінг.