Лукашэнку не падабаецца кіраўнік назіральнікаў АБСЕ

• 15.08.2012, 13:35

Дыктатар лічыць, што ў ПА АБСЕ маглі б знайсці «больш дасведчанага чалавека» для назірання за «выбарамі», чым Матэа Мекачы.

Нагадаем, што італьянец Матэа Мекачы прызначаны кіраўніком назіральнікаў ад Парламенцкай Асамблеі АБСЕ на будучых «парламенцкіх выбарах» у Беларусі.

«Думаю, што маглі б знайсці больш дасведчанага чалавека ў частцы Беларусі і сітуацыі ў Рэспубліцы Беларусь. Мы ўважліва зараз вывучаем усе гэтыя пазіцыі і, вядома ж, будзем адпаведным чынам рэагаваць», - сказаў Аляксандр Лукашэнка падчас сустрэчы з кіраўніком МЗС Расеі Сяргеем Лаўровым.

Як адзначыў дыктатар, напярэдадні будучых «парламенцкіх выбараў» ёсць некаторыя насцярожваючыя фактары. «Вы разумееце, што ідзе актывізацыя палітычнай дзейнасці, і не заўсёды ў патрэбным накірунку. Але пакуль у Беларусі няма ніякіх такіх воплескаў, калі не лічыць Захад, які заўсёды нам падкіне нейкае пытанне », - адзначыў беларускі дыктатар.

Матэа Мекачы заўсёды быў прынцыповы ў ацэнцы сітуацыі ў Беларусі. Кіраўнік камітэта па правах чалавека ПА АБСЕ падтрымліваў кантакты са сваякамі палітычных зняволеных Беларусі, у тым ліку, з сястрой кандыдата ў прэзідэнты Беларусі Андрэя Саннікава Ірынай Багданавай, неаднаразова сустракаўся з рэдактарам сайта charter97.org, былой палітвязніцай Наталляй Радзінай, пастаянна ўздымаў пытанне парушэння праў чалавека ў Беларусі на ўсіх узроўнях.