Бундэстаг расследуе трэніроўкі беларускага АМАПа ў Германіі
- 25.08.2012, 15:02
Фракцыя СДПГ у Бундэстаге будзе ініцыяваць слуханні з нагоды супрацоўніцтва нямецкай паліцыі з беларускай міліцыяй.
Такую заяву зрабіў афіцыйны прадстаўнік фракцыі па пытаннях унутраных спраў Міхаэль Хартман, паведамляе газета Bild. Гаворка ідзе пра нямецкія падраздзяленні т.зв. паліцыі гатоўнасці (Bereitschaftspolizei), якія прыцягваюцца ў выпадках масавых беспарадкаў, катастроф, пошукавых аперацый, футбольных матчаў і інш, піша БелаПАН.
«Міністр унутраных спраў Фрыдрых павінен трымаць прамову і адказ перад камітэтам па ўнутраных справах. Ён павінен растлумачыць, ці сапраўды і на якой падставе становішча спраў хавалася ад парламента і ці сапраўды Міністэрства ўнутраных спраў свядома дэзінфармавала парламент», - сказаў Хартман.
Яшчэ летам 2010 года ў МЗС Германіі паўсталі вялікія сумневы адносна наладжанага ў 2008 годзе супрацоўніцтва паліцыі з беларускім бокам. У адрас паліцыі гатоўнасці па электроннай пошце былі накіраваны «розныя крытычныя пытанні», на якія былі атрыманы «уніклівыя адказы», паведамляе Bild.
Газета адзначае, што Бундэстаг практычна знаходзіўся ў недасведчанасці адносна паліцэйскага супрацоўніцтва з Менскам. Па запыце Левай партыі ў канцы 2011 года МУС патлумачыла, што супрацоўніцтва ажыццяўлялася перш за ўсё ў сферы забеспячэння бяспекі падчас «вялікіх спартыўных мерапрыемстваў», паколькі ў 2014 годзе ў Беларусі павінен прайсці чэмпіянат свету па хакеі. МУС адмаўляла трэніроўкі беларускай міліцыі, «вядомай сваімі жорсткімі дзеяннямі», і заявіла, што супрацоўніцтва было спынена ў канцы 2010 года. Аднак, па дадзеных Bild, да кастрычніка 2011 года адбылося яшчэ чатыры семінара: два ў Германіі і два ў Беларусі. Неназваны прадстаўнік МУС Германіі растлумачыў, што гаворка ідзе аб давядзенні да канца пачатых раней сумесных праектаў. Паводле яго слоў, адзінкавыя лакальныя кантакты працягваюцца да гэтага часу.
Газета паведамляе, што ў жніўні 2010 года ў Германіі праходзілі падрыхтоўку «як мінімум адзін маёр і адзін капітан», і адной з задач было навучанне разгону буйных дэманстрацый і мэтанакіраванаму затрыманню галоўных дзеючых асоб.
Па інфармацыі выдання Der Tagesspiegel, у лістападзе 2010 года беларускім сілавікам было дазволена назіраць за дзеяннямі нямецкіх паліцэйскіх падчас разгону дэманстрантаў, якія пратэставалі супраць транспарціроўкі цягніком «Кастор» радыеактыўных адходаў у сховішча Горлебен (Ніжняя Саксонія). Тады ўжываліся вадамёты, слёзатачывы газ і гумовыя дубінкі. У цэлым з нямецкай дапамогай падрыхтоўку ў Германіі і на радзіме прайшло ў агульнай колькасці 500 супрацоўнікаў беларускіх праваахоўных органаў.
«Калі апазіцыянеры ў Менску зноў будуць збітыя дубінкамі сіл бяспекі Лукашэнкі, па меншай меры, мы будзем ведаць, дзе беларуская міліцыя ўдасканальвала сваё рамяство», - заявіў эксперт па ўнутраных справах фракцыі Левай партыі ў бундэстаге Ян Корце, паведамляе Der Spiegel.
Нямецкія СМІ адзначаюць, што федэральная паліцыя і крымінальная служба з 2008 года навучалі беларускіх калег, у тым ліку памежнікаў, па распараджэнні ўрада канцлера Ангелы Меркель. Пры гэтым МУС Германіі дзейнічала па ўзгадненні з МЗС. Супрацоўніцтва пачалося пасля таго, як Менск «даў сігнал гатоўнасці да прававых рэформ», і мела мэту «садзейнічаць дэмакратычнай і прававой свядомасці». У ліпені 2012 года быў адпраўлены ў адстаўку шэф нямецкай паліцыі Матыяс Зеегер. Сярод іншага яму ставіліся ў віну кантакты з беларускім урадам.
24 жніўня гэтага года прэс-сакратар урада ФРГ Штэфі Зайберт заявіў, што доўгатэрміновае супрацоўніцтва з Беларуссю мела тады «дапушчальныя падставы». Паводле яго слоў, у сваіх дзеяннях нямецкая паліцыя, «наколькі гэта магчыма», заўсёды імкнецца да зняцця напружанасці і негвалтоўных метадаў.
Прадстаўнік МУС Германіі заявіў у інтэрв'ю Der Spiegel, што з 1 студзеня 2007 года па 25 лістапада 2010 года ў ходзе пяці мерапрыемстваў было навучана ў агульнай складанасці 77 супрацоўнікаў памежнай службы і 16 супрацоўнікаў службаў бяспекі з Беларусі. Падрыхтоўка мела мэту павысіць узровень беларускіх калегаў да стандартаў Еўразвяза.