Фільм «Жыве Беларусь!» патрапіў у сусветную дыстрыбуцыю

• 29.08.2012, 16:29

Прэм'ера фільма, верагодна, адбудзецца ў лістападзе, а паказы ў кінатэатрах - вясной.

Intramovies - італьянская кампанія, якая будзе займацца сусветнай дыстрыбуцыяй фільма «Жыве Беларусь!». Пра гэта паведамілі ў польскай дзяржаўнай кінастудыі (WFDiF), перадае «Радыё Свабода».

Intramovies - незалежная кампанія, створаная больш за 40 гадоў таму, з'яўляецца міжнародным дыстрыбутарам фільмаў з усяго свету. Кампанія бярэ ў распаўсюд не больш за 8-10 стужак у год. Многія з іх атрымліваюць прызнанне на міжнародных фестывалях. Intramovies з'яўляецца афіцыйным дыстрыбутарам сотняў карцін.

Кампанія будзе прадстаўляць інтарэсы фільма, займацца яго вылучэннем на міжнародныя фестывалі, паказамі ў кінатэатрах. Па словах прадстаўніка польскай дзяржаўнай кінастудыі, мэта - каб фільм трапіў у кінатэатры Германіі, Італіі, іншых краін.

Прэм'ера фільма, верагодна, адбудзецца ў лістападзе на адным з еўрапейскіх фестываляў. А пракат у кінатэатрах, па папярэдняй дамоўленасці, - вясной 2013.

Нагадаем, фільм апавядае аб сучаснай Беларусі.

Маладога рок-музыку забіраюць у войска, а гурт трапляе ў чорныя спісы. У войску ён пачынае весці дзённік у інтэрнэце, дзе апісвае дзедаўшчыну і ўмовы службы. Дзённік перарастае ў адкрытае супрацьстаянне з рэжымам.

Фільм здымаўся ў лістападзе-снежні 2011 года ў Польшчы. Трэйлер фільма быў паказаны на Берлінскім кінафестывалі вясной 2012. Гэта дапамагло фільму патрапіць на кінарынак у Каны.

Сцэнар - беларускі журналіст і актывіст Франак Вячорка і Кшыштаф Лукашэвіч. У фільме зняліся рэпер Вінцэнт, акцёры Дзяніс Тарасенка, Алег Сідорчык, Аляксандр Малчанаў, Раман Падаляка, Анатоль Кот, шоўмэн Аляксандр Памідораў, польская актрыса Караліна Грушка.