Выбаршчыкі: Трэба быць поўным ідыётам, каб верыць Ярмошынай
- 3.08.2012, 14:03
Людзі не вераць у тое, што большасць беларусаў пойдзе на «выбары».
«Народная Воля» вырашыла пацікавіцца ў звычайных беларусаў іх стаўленнем да «выбараў». Іх адказы кажуць самі за сябе.
«Асабіста я ніяк не магу пагадзіцца з «прагнозам» улад адносна колькасці грамадзян, якія нібыта гатовыя прыняць удзел у восеньскіх «парламенцкіх выбарах». Гэтак жа думаюць мае сябры, знаёмыя, не кажучы ўжо пра блізкіх і далёкіх сваякоў. Трэба быць поўным ідыётам, каб паверыць у сумленнасць Ярмошынай і кампаніі, усёй гэтай збанкрутавалай сістэмы. Колькі можна наступаць на адны і тыя ж выбарчыя граблі? Хай сабе гуляюць у свае гульні. Байкот і толькі байкот! Гэта, напэўна, адзінае, на што здольныя беларусы. Калі не можам прыпадобніцца арабам, то хоць бы пакажам дулю ў кішэні», - кажа Ядвіга Кійко, настаўніца музыкі з Баранавічаў.
«Ніякія выбары пры дадзенай сістэме «уладных каардынат» не выклікаюць у мяне даверу. Адсюль рабіце выснову... Калі зусім коратка, то мне цяжка паверыць, што суайчыннікі рынуцца на выбарчыя ўчасткі. Чаму? Трэба зусім сябе не паважаць, каб у чарговы раз дазволіць абвесці вакол пальца. Хопіць папярэдніх «парламентаў», якія былі толькі для адводу вачэй, для мэблі. Але ў кожнага свая галава на плячах, свой розум і сваё сумленне», - лічыць Міхаіл Туравец, пенсіянер з Менска.
«Не ведаю, як іншыя, але мне здаецца, што наўрад ці столькі людзей ахвяруюць уласным часам для сумніўных «выбараў». Праходзілі жа «выбарчыя ўрокі» не раз... І што? Толькі і думаеш, як выжыць, як пракарміць сям'ю на тыя пенсійныя капейкі, якія табе кідаюць, быццам жабраку. Палітыкі, улада жывуць самі па сабе, а ўсе астатнія - выжываюць, як могуць... Таму я лепш паеду на дачныя соткі або займуся хатняй гаспадаркай - гэта і карысна, і прыносіць задавальненне. А «выбары дэпутатаў» ... Гэта для тых, каго ўсё задавальняе. Пакуль не выкуется грамадзянская супольнасць, а яна куецца ня хаджэннем «быкоў на згубу», ці варта патураць тым, хто вам дурыць галовы? »- пытаецца пенсіянерка Лізавета Станкевіч з Менска.