Саўмін: Зімовыя боты беларускі павінны насіць 5 гадоў
- 26.09.2012, 10:55
На адзенне беларусам можна траціць 171 305 рублёў у месяц.
Як распараджацца ўласнай зарплатай, траціць яе на вопратку альбо адкладаць зберажэнні - асабісты выбар кожнага. Аднак сацыяльныя нарматывы змяшчаюць дакладнае бачанне таго, у якіх прапорцыях павінен дзяліцца бюджэт беларусаў. Так, згодна з дзеючай структурай бюджэту пражытачнага мінімуму (БПМ), прадметы гардэроба павінны складаць 20,3% ад агульнага аб'ёму выдаткаў, піша mojazarplata.by.
З улікам таго, што памер БПМ у сярэднім на душу насельніцтва складае 843 870 рублёў у месяц, на абноўкі сярэднестатыстычнаму беларусу штомесяц прыходзіцца 171 305 рублёў.
У рамках гэтай сумы самымі значнымі пакупкамі могуць быць шапка (коштам парадку 150 000 рублёў), шалік (ад 100 000 рублёў) або тры пары цёплых калготак Conte 280 DEN (48 700 рублёў за пару).
Купля дэмісезонных ботаў са штучных матэрыялаў абыйдзецца ўжо ў суму ад 299 000 рублёў, а зімовых - ад 369 000 рублёў. Такім чынам, на куплю новай пары абутку да зімы прыйдзецца збіраць больш за два месяцы. А каб стаць уладальніцай балоневага паліто на сінцепоне (ад 789 000 рублёў), трэба было пачынаць адкладаць яшчэ ўлетку.
Тэрмін службы жаночых ботаў, чаравікоў і красовак - пяць гадоў
Відавочна, што прадпісанай БПМ сумы недастаткова для абнаўлення гардэроба. Адказ на пытанне, як жа тады спланаваць куплі, змяшчаецца ў пастанове Савета міністраў № 112 «Аб зацвярджэнні пражытачнага мінімуму» ад 1 лютага 2011 г.
У ім прадстаўлены пералік прадметаў гардэроба для мужчын, жанчын і дзяцей. Згодна з дакументам, беларусам не трэба купляць вопратку і абутак кожны сезон, а большасць асабістых рэчаў павінны служыць сваім уладальнікам 3 - 6 гадоў.
Часцей за ўсё жанчынам можна купляць калготкі (7 пар на год) і шкарпэткі (4 пары ў год). Аб куплі ботаў (адна пара зімовых і адна дэмісезонных) варта задумвацца раз у 5 гадоў. Зімовая куртка павінна праслужыць беларусцы 7,5 гадоў, а дэмісезонная - 6 гадоў. Пацешыць сябе новай торбай можна раз у шэсць гадоў.
Куплю зімовых аксесуараў таксама неабходна старанна спланаваць і абмежавацца двума шапкамі на 5,7 гадоў, адным шалікам на 3,8 года, двума парамі пальчатак на 3,2 года.