Нацбанк марыць нарасціць ЗВР за кошт замежных інвестыцый

• 27.09.2012, 13:14

Прагноз аб'ёму міжнародных рэзерваў Нацбанка на канец 2013 года стаў адзіным паказчыкам асноўных напрамкаў грашова-крэдытнай палітыкі, які прэс-служба Лукашэнкі «забылася» згадаць.

І зусім не выпадкова. Бо не столькі сума чаканага НБ РБ прыросту ЗВР у наступным годзе, колькі крыніцы гэтага прыросту больш за ўсё павесялілі экспертную супольнасць на фоне астатніх паказчыкаў, большасць з якіх на самой справе віламі па вадзе пісана.

«З улікам пагашэння Рэспублікай Беларусь унутраных і знешніх абавязацельстваў у замежнай валюце, прыцягнення прамых замежных інвестыцый у эканоміку краіны (4,5 млрд. даляраў ЗША на чыстай аснове), дасягнення станоўчага сальда знешняга гандлю таварамі і паслугамі міжнародныя рэзервовыя актывы ў адпаведнасці з метадалогіяй Міжнароднага валютнага фонду за 2013 год узрастуць на 0,3-0,7 млрд. даляраў ЗША», - гаворыцца ў АНДКП (тэкст апублікаваны на сайце НБ РБ).

На самой справе велічыня прыросту ЗВР - 300-700 млн. даляраў (мін-макс. - у залежнасці ад сітуацыі ў эканоміцы) - усяго толькі адлюстроўвае адно з абавязацельстваў Беларусі перад АКФ ЕўрАзЭС, якое НБ РБ быў вымушаны адлюстраваць ў дакуменце. Але вось крыніцы фарміравання гэтага прыросту можна было прапісаць больш вытанчана.

Пачнем з унутраных і знешніх абавязацельстваў у валюце. Як паведамлялася, у перыяд з ліпеня-2012 па ліпень-2013 Беларусі трэба пагасіць, рэфінансаваць, рэструктураваць, пралангіраваць, перапазычыць, выпытаць, на каленях і ў іншых партнёрскіх пазіцыях 19,2 млрд. даляраў (у тым ліку дзяржпазыка).

Напрыклад, той жа Мінфін РБ, якому трэба будзе ў 13 годзе накіраваць на абслугоўванне дзяржпазыкі 3,1 млрд. даляраў, асабліва напружвацца не плануе. Як заявіў учора міністр фінансаў А.Харкавец, 1,5 млрд. з названай сумы Мінфін РБ рэфінансуе. Астатняя сума будзе пагашана за кошт куплі валюты ў Нацбанка РБ. Аналагічным чынам паступяць і камерцыйныя даўжнікі - палегчаць золатавалютны запас краіны, піша АФН.

Вельмі цікава было даведацца, што ў верасні 2012 года Нацбанк РБ усё яшчэ верыць у станоўчае сальда знешняга гандлю. І гэта пасля таго, як дэ-факта была ліквідаваная схема бяспошліннага экспарту нафтапрадуктаў пад выглядам растваральнікаў, а Расея прымае меры па скарачэнні паставак нафты і нафтапрадуктаў у РБ строга ў адпаведнасці з зацверджаным балансам саюзнай дзяржавы. А яшчэ (Расея) уступіла ў СГА, прыадчыніўшы тым самым беларускі рынак для злосных канкурэнтаў з трэціх краін, з якімі беларускія ўлады вядуць пастаянныя баі з пераменным поспехам на працягу апошніх 4 гадоў. Так што сальда знешняга гандлю - хутчэй растратчык валюты, чым яе здабытчык: калію больш, чым спажывае сусветны рынак, прадаць не атрымаецца, попыт на прадукцыю Мінпрама РБ наўрад ці вырасце і г.д.

Застаюцца толькі 4,5 млрд. даляраў прамых замежных інвестыцый, якія Нацбанк налічыў, а дакладней спісаў з асноўных паказчыкаў сацыяльна-эканамічнага развіцця, прычым жывымі грашыма, а не ў выглядзе звязаных кітайскіх крэдытаў. Але зноў жа: стаўленне ўлад да прыватызацыі пакуль не змянілася, а магчымы продаж МТС за 1 млрд. даляраў інвестыцыйнага надвор'я не зменіць. Ну, яшчэ некалькі сотняў млн. даляраў увойдуць у банкаўскую сістэму і рэальны сектар праз павелічэнне УФ, уласнага капіталу і размеркавання прыбытку. Каб дацягнуць да 4,5 млрд. - прыйдзецца вельмі шчыльна працаваць з замежнымі інвестарамі і сусветнай фінансавай супольнасцю, а такая праца немагчымая без палітычных саступак.

Зрэшты, казаць пра рост ЗВР у 2013 годзе пакуль вельмі і вельмі заўчасна - трэба яшчэ вельмі пастарацца і скончыць бягучы год без драматычных страт.