Спецдакладчыкам ААН па Беларусі можа стаць Міклаш Харашці

• 27.09.2012, 15:29

Старшыня Рады ААН па правах чалавека Лора Дзюпуі Ласер рэкамендуе прызначыць на пасаду спецдакладчыка па сітуацыі ў Беларусі Міклаша Харашці.

Пра гэта гаворыцца ў афіцыйным лісце, які яна накіравала сябрам савета, піша БелаПАН.

Акрамя Харашці (Венгрыя), які займаў пасаду прадстаўніка АБСЕ па свабодзе СМІ, кансультатыўная група рэкамендавала ў якасці кандыдатаў на пасаду спецдакладчыка па Беларусі былога суддзю Страсбургскага суда Ханне-Саві Грэве (Нарвегія) і юрыста Джарэда Генсера (ЗША).

Нягледзячы на тое, што ў спісе прэтэндэнтаў кансультатыўная група на першае месца паставіла Грэве як прыярытэтнага кандыдата, Ласер спыніла свой выбар менавіта на Харашці. Яна рэкамендуе Харашці на пасаду спецдакладчыка па Беларусі, прымаючы ў тым ліку пад увагу яго вопыт і веданне рускай мовы.

Чакаецца, што рашэнне па кандыдатуры спецдакладчыка СПЧ прыме 28 верасня ў другой палове дня.

Міклаш Харашці (Венгрыя) узначальваў місіі Арганізацыі па бяспецы і супрацоўніцтву ў Еўропе (АБСЕ) па назіранні за выбарамі ў розных краінах. Ён таксама займаў пасаду прадстаўніка АБСЕ па свабодзе СМІ, мае вопыт працы з правамі чалавека і грамадзянскай супольнасцю.