Ярмошына на пенсію не збіраецца

• 28.09.2012, 12:40

Старшыня Цэнтрвыбаркама плануе на гэтай пасадзе працаваць і на наступных «парламенцкіх выбарах».

«Тэрмін маіх паўнамоцтваў заканчваецца ў снежні 2016 года. Калі пашанцуе, то давядзецца праводзіць яшчэ адны парламенцкія выбары», - заявіла журналістам у пятніцу ў Менску Лідзія Ярмошына.

Старшыня Цэнтрвыбаркама таксама сцвярджае, што ў краіне няма палітвязняў, перадае «Інтэрфакс».

«Што тычыцца «политвязней» (палітвязняў), я пра гэта сказала і пры сустрэчы з прадстаўнікамі місіі АБСЭ, у Беларусі няма ніякіх «политвязней», - заявіла Л.Ярмошына журналістам у пятніцу ў Менску.

«Ёсць грамадзяне, якія знаходзяцца ў месцах пазбаўлення волі за ўчыненне крымінальных злачынстваў, звязаных, у тым ліку, з пагромамі і пагрозай жыцця членам ЦВК. Яны зусім такія ж, як тыя, якіх сустрэлі гумовымі кулямі ў Мадрыдзе», - сказала кіраўнік ЦВК.