Генпракуратура ўпэўненая ў выдачы Арыніча
- 6.09.2012, 15:07
Генеральны пракурор Беларусі выказаў упэўненасць, што пытанне экстрадыцыі былога дырэктара ЗАТ «Пінскдрэў» Ларана Арыніча будзе вырашана.
Аб гэтым Аляксандр Канюк сёння паведаміў журналістам пасля міжведамаснай нарады па выніках праверкі выканання Дырэктывы № 1 «Аб мерах па ўмацаванні грамадскай бяспекі і дысцыпліны» у ЗАТ «Холдынгавая кампанія «Пінскдрэў», якая адбылася сёння ў Брэсце, перадае БелТА.
«У цяперашні час ідзе афіцыйны працэс па экстрадыцыі Ларана Арыніча», - адзначыў генпракурор. Паводле яго пераканання, гэтае пытанне павінна вырашыцца, так як ніякай палітычнай падаплёкі ў гэтай справе няма. «Гэта звычайнае крымінальнае злачынства, і ўцёк ён за мяжу зусім не па палітычных прычынах, а каб пазбегнуць крымінальнай адказнасці», - растлумачыў ён.
Што датычыцца праверкі холдынгавай кампаніі «Пінскдрэў», якая папярэднічала сённяшняй нарадзе, Аляксандр Канюк растлумачыў, што праводзілася яна пры ўдзеле Савета бяспекі, МНС, санітарнай службы, Мінпрацы і сацабароны. Пасля здарэння, якое адбылося на адным з прадпрыемстваў кампаніі, «Пінскдрэў» застаецца на асаблівым кантролі. «На прадпрыемствах холдынгу застаецца яшчэ маса нявырашаных пытанняў, якія датычацца забеспячэння бяспекі працы. І ў дадзеным выпадку мэтай праверкі і нарады была выпрацоўка рашэнняў па якаснай змене сітуацыі. Пракуратура ў дадзеным выпадку ўзяла на сябе каардынуючую функцыю па ўзаемадзеянні дзяржаўных служб, у абавязкі якіх уваходзіць кантроль за выкананнем правіл бяспекі на вытворчасці», - растлумачыў генпракурор.
Як паведамляў сайт charter97.org, 25 кастрычніка 2010 года ў СТАА «Пінскдрэў - ДСП» ЗАТ «Холдынгавая кампанія «Пінскдрэў» адбыўся выбух, у ліку пацярпелых апынуліся 21 чалавек, з якіх 14 памёрлі. У сакавіку 2012 года быў вынесены прысуд па справе аб выбуху. Некалькі службовых асоб былі прызнаныя вінаватымі ў службовай халатнасці і парушэнні патрабаванняў пажарнай бяспекі і прысуджаны да розных тэрмінаў пазбаўлення волі. Крымінальная справа ў дачыненні да былога гендырэктара «Пінскдрэва» Ларана Арыніча была выдзелена ў асобную вытворчасць з-за таго, што ён знаходзіўся ў вышуку . У жніўні бягучага года ў выніку ўзаемадзеяння беларускага Інтэрпола з польскай паліцыяй Ларан Арыніч быў знойдзены ў суседняй краіне. Польская паліцыя ўстанавіла, што Ларан Арыніч жыве каля горада Радам у арандаваным доме.