Андрэй Гайдукоў - маці: «Не чакай цудаў»

• 11.01.2013, 17:17

Наваполацкі актывіст ужо больш за два месяцы знаходзіцца ў няволі. Падрабязнасці яго справы да гэтага часу невядомыя.

«Не чакай, мама, цудаў. І не турбуйся. Такія правілы я калісьці прыняў завочна і быў гатовы, што мяне ў любы момант могуць за што-небудзь арыштаваць. Прабач мяне за ўсе стрэсы, якія я прынёс», - піша Андрэй Гайдукоў у апошнім лісце да сваёй маці Вольгі.

Заказны ліст прыйшоў 11 студзеня. Вольга Гайдукова паведаміла «Еўрарадыё», што пасля Новага года сувязь з сынам нармальная. Ад яго спраўна прыходзяць лісты. Адзінае, што яе насцярожвае, - сын просіць не пісаць шмат лістоў. Вольга Гайдукова лічыць, што яны ў «амерыканку» даходзяць не ўсе; магчыма, гэтым і выкліканая просьба Андрэй.

Нагадаем, Андрэй Гайдукоў, моладзевы апазыцыйны дзеяч з Наваполацка, быў затрыманы супрацоўнікамі КДБ у Віцебску яшчэ 8 лістапада 2012 года. Яго абвінавацілі ў шпіянажы на карысць замежнай выведкі. Падрабязнасці справы да гэтага часу невядомыя. Родныя і паплечнікі Гайдукова перакананыя, што яго затрыманне звязана з апазіцыйнымі поглядамі хлопца.