Беларусы не рызыкуюць захоўваць зберажэнні ў рублях

• 21.10.2013, 13:37

У кастрычніку прыросту рублёвых укладаў насельніцтва не назіраецца.

Пра гэта гаворыцца ў інфармацыйных матэрыялах, падрыхтаваных для кансультатыўнага савета пры Нацыянальным банку, пасяджэнне якога адбылося на мінулым тыдні, піша БелаПАН.

Па дадзеных беларускага цэнтрабанка, адсоткавыя стаўкі па рублёвых крэдытах і дэпазітах знаходзяцца на высокім узроўні. «У верасні 2013 года сярэднія адсоткавыя стаўкі банкаў па новым рублёвых крэдытах юрыдычным асобам склалі 35% гадавых, па новых тэрміновых банкаўскіх укладах фізічных асоб - 40,4% гадавых. Пры гэтым узровень інфляцыі ў верасні знізіўся да 15,4% (да адпаведнага месяцу мінулага года)», - нагадвае Нацбанк.

Тым не менш, «нягледзячы на высокія адсоткавыя стаўкі, прыросту тэрміновых рублёвых дэпазітаў насельніцтва не назіраецца», канстатуе цэнтральны банк Беларусі. «З пачатку кастрычніка 2013 года без уліку налічаных адсоткаў аб'ём тэрміновых рублёвых банкаўскіх укладаў практычна не змяніўся», - гаворыцца ў матэрыялах Нацбанка, тэкст якіх мае агенцтва.

Нагадаем, у першай палове 2013 года на фоне адносна высокіх адсоткавых ставак па рублёвых дэпазітах і практычна нязменным курсе даляра назіраўся ўстойлівы рост укладаў насельніцтва ў нацыянальнай валюце. Аднак у чэрвені на фоне павелічэння курсу даляра рост рублёвых укладаў спыніўся, а ў ліпені назіраўся адток зберажэнняў у нацвалюце. Рэагуючы на гэта, банкі на працягу лета істотна павысілі стаўкі па дэпазітах у нацвалюце, у выніку чаго рост рублёвых зберажэнняў насельніцтва ў жніўні аднавіўся.

У верасні 2013 года, нягледзячы на высокія адсоткавыя стаўкі, у банках зноў было зафіксавана зніжэнне (на 118 млрд. рублёў) тэрміновых дэпазітаў насельніцтва ў нацвалюце. На думку экспертаў, зніжэнне рублёвых укладаў абумоўлена дэвальвацыйнымі чаканнямі насельніцтва, якія на фоне росту курсу даляра застаюцца на высокім узроўні.

У верасні, паводле дадзеных камерцыйных банкаў, пазбегнуць адтоку рублёвых укладаў змаглі тыя банкі, якія прапаноўвалі ўкладчыкам найбольш прывабныя ўмовы размяшчэння дэпазітаў. «Розніца паміж стаўкамі банкаў, у якіх назіраецца адток і прырост укладаў, складаў 3-5 адсоткавых пунктаў. Хтосьці акрамя высокай адсоткавай стаўкі прапануе падарункі, каб прыцягнуць кліентаў. Трэба прапаноўваць бонусы, і тады рублёвыя сродкі насельніцтва можна прыцягнуць», - распавёў прадстаўнік аднаго з банкаў.