Кіраўніка пагранкамітэта змянілі праз самалёт з кантрабандай?

• 2.11.2013, 19:08

Адстаўка Аляксандра Баечкі можа быць звязаная з крушэннем самалёта, які перавозіў кантрабанду з Беларусі.

Раніцай 10 кастрычніка ў Валынскай вобласці разбіўся Ан-2, які мог перавозіць кантрабандныя беларускія цыгарэты з тэрыторыі Беларусі, паведамляе БелаПАН. Загінулі пілот і пасажыр, асобы якіх ужо ўстаноўленыя - гэта жыхар Валыні і адэсіт. Як сцвярджаюць украінскія журналісты, каля месца трагедыі быў заўважаны грузавік, у які грузілі мяшкі з цыгарэтамі беларускай вытворчасці. Поле вакол месца падзення самалёта было засыпана цыгарэтамі. Гэта і дазволіла выказаць здагадку, што самалёт выкарыстоўваўся кантрабандыстамі.

На просьбу пракаментаваць гэтую інфармацыю ў прэс-службе Дзяржпагранкамітэта 11 кастрычніка заявілі: «Інфармацыя вывучаецца, яна патрабуе праверкі, у тым ліку сумесна з украінскай стараной. Пакуль ніякіх каментароў няма».

Палкоўнік Аляксандр Баечка, якога сёння змяніў Леанід Мальцаў, быў прызначаны старшынём Дзяржаўнага пагранічнага камітэта Беларусі 2 жніўня 2012 года пасля адстаўкі ранейшага кіраўніка пагранведамства Ігара Рачкоўскага, што з'явілася следствам так званага «плюшавага дэсанту» 4 ліпеня. Шведскі лёгкаматорны самалёт лётаў над тэрыторыяй Беларусі амаль паўтары гадзіны, над Менскам і Івянцом з яго былі скінутыя сотні плюшавых цацачных мядзведзяў. Акцыя праводзілася ў падтрымку свабоды слова ў Беларусі.