Сутычкі каля будынка ўрада Украіны (Відэа)
- 25.11.2013, 11:21
Каля Кабміна Украіны сёння раніцай аднавіліся сутыкненні мітынгоўцаў з праваахоўнікамі, быў ужыты слёзацечны газ.
Сутыкненні паміж прыхільнікамі еўраінтэграцыі Украіны і супрацоўнікамі спецпадраздзяленняў міліцыі аднавіліся ў панядзелак каля будынка ўрада краіны, перадае карэспандэнт РІА Новости.
Праваахоўнікі, каб адціснуць пратэстоўцаў ад будынку кабінета міністраў, ужывалі дубінкі і слёзацечны газ. Пратэстоўцы у сваю чаргу зрывалі шлемы з вартавых парадку і кідалі ў іх розныя прадметы. Да месца падзей сцягваюцца дадатковыя сілы праваахоўнікаў. Сутыкненні працягваліся каля паўгадзіны.
Раней каля 500 мітынгоўцаў арганізаванай калонай прыйшлі да будынка ўкраінскага ўрада з патрабаваннем адстаўкі прэм'ер-міністра Мікалая Азарава. Удзельнікі разгарнулі вялікі плакат, якія заклікае вызваліць з турмы экс-прэм'ера Юлію Цімашэнка, партыйныя сцягі апазіцыйнай партыі «Батькивщина», партыі «УДАР» і нацыяналістычнай «Свабоды», а таксама дзяржаўныя сцягі Украіны і ЕЗ.
Раней стала вядома, што па факце спробы штурму будынка ўзбуджаная крымінальная справа. Па якіх менавіта артыкулах распачатая справа, пакуль невядома. Нагадаем, падчас беспарадкаў пацярпелі па папярэдніх дадзеных, двое супрацоўнікаў міліцыі. Тым часам на дзеянні праваахоўнікаў таксама пададзеныя скаргі. «Да нас паступілі звароты ад дэпутата і журналісткі, яны заявілі, што іх штурхнулі супрацоўнікі міліцыі. Заявы зарэгістраваныя і перададзеныя ў пракуратуру. Іншых зваротаў за апошнія суткі з боку мітынгоўцаў не было», - заявілі ў галоўным упраўленні МУС Украіны ў Кіеве.
Напярэдадні шматтысячныя акцыі прайшлі ў сталіцы і рэгіёнах Украіны. Па розных дадзеных, у Кіеве ў акцыі прынялі ўдзел ад 50 да 100 тысяч чалавек. У нядзелю ўвечары праваахоўнікі спрабавалі вызваліць дарогі ў цэнтры горада, занятыя мітынгоўцамі, «Беркут» паспрабаваў адштурхнуць удзельнікаў акцыі, адбылася бойка, у міліцыю кідалі камяні. У выніку «Беркут» адступіў, а мітынгоўцы пазней самі сышлі з праезнай часткі. На лесвіцы каля будынка «Украінскага дома» пратэстоўцы паставілі намёты. У выніку сутычак пацярпелі два супрацоўнікі праваахоўных органаў.
Нагадаем, урад Украіны 21 лістапада пастанавіў прыпыніць падрыхтоўку да заключэння пагаднення аб асацыяцыі з Еўразвязам, матывуючы гэта рашэнне неабходнасцю развіцця эканамічных адносінаў з Расеяй і СНД. Украінскі Кабмін даручыў профільным міністэрствам аднавіць дыялог з краінамі Мытнага саюза і СНД па актывізацыі гандлёва-эканамічных сувязяў, а таксама прапанаваць РФ і ЕЗ стварыць трохбаковую камісію. Апазіцыя абвінаваціла прэзідэнта і ўрад у зрыве еўраінтэграцыі, лічачы гэты крок парушэннем канстытуцыі Украіны і здрадай інтарэсаў украінскага народа.