Самотны Макей у Вільні (Фотафакт)

• 29.11.2013, 13:31

Кіраўнік МЗС Беларусі прысутнічае на саміце «Усходняга партнёрства» як ізгой.

Учора ў Вільні пачаўся саміт ініцыятывы ЕЗ «Усходняе партнёрства», у якім прынялі ўдзел кіраўнікі 28 краін Еўразвяза і 6 краін «Усходняга партнёрства» - Украіны, Грузіі, Малдовы, Арменіі, Азербайджана і Беларусі.

Было шмат спрэчак, каго запрашаць на саміт ад Беларусі, таму што кіраўнік МЗС Уладзімір Макей з'яўляўся неўязным у краіны ЕЗ. Былы кіраўнік адміністрацыі Лукашэнкі з'яўляецца адным з арганізатараў жорсткага разгону і масавых арыштаў падчас акцыі пратэсту супраць фальсіфікацыі вынікаў прэзідэнцкіх выбараў 2010 года.

У выніку ў Беларусь было перададзена запрашэнне без канкрэтнага прозвішча, і ў Вільню адправіўся Макей.

Як паведамілі charter97.org еўрапейскія дыпламатычныя крыніцы, праблемы са знаходжаннем Макея ў кампаніі лідараў еўрапейскіх дзяржаў пачаліся яшчэ ўчора. Падчас нефармальнай вячэры далёка не ўсе лідары краін ЕЗ гатовыя былі сесці за адзін стол з паплечнікам дыктатара Лукашэнкі. Арганізатарам давялося прыкласці нямала намаганняў, каб вырашыць гэтае пытанне і пазбегнуць канфліктаў.

Сёння падчас фармальных мерапрыемстваў зносіны з кіраўніком МЗС Беларусі таксама былі вельмі абмежаванымі. Як паведамілі крыніцы, падчас закрытых сустрэч Макею было перададзенае даволі жорсткае пасланне Лукашэнку з патрабаваннем неадкладна вызваліць палітвязняў.

«Размовы з Макеем праходзяць у вельмі жорсткай форме. Такое ж жорсткае пасланне ад кіраўнікоў ЕЗ перададзена праз яго і Лукашэнку», - паведаміла крыніца.