Зміцер Шчыгельскі: Дыктатар хворы і мае патрэбу ў ізаляцыі

• 12.02.2013, 10:20

Вядомы беларускі псіхіятр заявіў пра гэта падчас свайго выступлення ў Нью-Йорку.

Яно адбылося 10 лютага 2013 года, паведамляе Polskie radio.

Зміцер Шчыгельскі пацвердзіў, што ён па-ранейшаму лічыць дыягназ, які ён паставіў Лукашэнку ў 2001 годзе, правільным. Паводле яго слоў, з яго высновамі згодныя і іншыя спецыялісты ў галіне псіхіятрыі, у тым ліку - у Беларусі, Расеі і іншых краінах.

Доктар Шчыгельскі ўпершыню выступіў з гэтай нагоды з часу публікацыі сваёй скандальна вядомага артыкула «Гісторыя хваробы Аляксандра Рыгоравіча Лукашэнкі» ў 2001 годзе. Адразу пасля публікацыі ён з сям'ёй быў вымушаны з'ехаць з Беларусі, бо прадстаўнікі беларускіх уладаў адкрытым тэкстам пагражалі, што «зловяць яго нават у джунглях Амазонкі». У ЗША Зміцер Шчыгельскі атрымаў палітычны прытулак, аднак да апошняга часу не ўдзельнічаў у грамадскім жыцці.

Ён лічыць, што стан Лукашэнкі за мінулыя гады пагоршыўся, а з узростам хвароба будзе яшчэ больш прагрэсаваць, ствараючы яшчэ большую небяспеку як для атачэння беларускага кіраўніка, так і для ўсяго беларускага грамадства.

«Я спачуваю яму, - адзначае псіхіятр. - Бо той свет, у якім ён жыве, на самай справе вельмі цяжкі, і ён моцна пакутуе».

На пытанне прысутных аб тым, якія былі б яго рэкамендацыі як псіхіятра і спецыяліста, доктар Шчыгельскі сказаў, што для такіх, як Лукашэнка, патрабуецца ізаляцыя і прымусовае лячэнне, так як гэты чалавек небяспечны як для сябе самога, так і для іншых людзей.

Прысутныя на сустрэчы таксама задавалі пытанні з нагоды ўплыву Лукашэнкі на яго сям'ю і, у прыватнасці - на сыноў Колю і Віктара. Доктар Шчыгельскі адмовіўся каментаваць гэтыя выпадкі, спасылаючыся на адсутнасць матэрыялу для аналізу, адзначыўшы аднак, што тое, што адбываецца з Колем, няправільна з пункту гледжання педагогікі і можа мець небяспечныя наступствы для сына дыктатара.