Павел Севярынец: Дыялог з ЕЗ - усяго толькі спосаб шантажаваць Крэмль

• 21.02.2013, 18:00

Улада хоча не весці дыялог, а выключна дыктаваць умовы.

Так палітвязень Павел Севярынец пракаментаваў сайту charter97.org заклік Еўразвяза да беларускіх уладаў пашырыць удзел у дыялогу аб мадэрнізацыі краіны.

«Сапраўды, усе словы пра дыялог важныя і правільныя, але толку ад іх у апошнія гады вельмі мала. Гэта нагадвае гарох, які разбіваецца аб жалезабетонную сцяну рэжыму. Улада хоча не весці дыялог, а выключна дыктаваць умовы. Менавіта таму беларускі рэжым называецца дыктатурай», - адзначыў палітвязень.

Ён дадаў, што ў дадзены момант ўвесь «дыялог» заключаецца ва ўстанове крымінальных спраў, пераследзе іншадумцаў і здзеках над палітвязнямі.

«Еўропа прапануе сесці за круглы стол і пачаць перамовы. Часам гэта атрымліваецца, як гэта было нядаўна ў Вене. Але гэта хутчэй абмен думкамі, чым дыялог. Лукашэнка робіць з гэтага «экспартны тавар» і інструмент для шантажу Крамля. Выглядае гэта так: «Дайце грошай, а не то будзем сябраваць з Еўразвязам». Беларускі рэжым даўно вядзе гэтую гульню, і ўсе пра гэта ведаюць.

Еўрапейцам вельмі цяжка вырашыць пытанне аб увядзенні санкцый у сілу менталітэту і эканамічных інтарэсаў. ЕЗ не можа заняць такую жорсткую пазіцыю як ЗША, якія ўводзяць санкцыі і толькі тады вядуць перамовы. Так што, у агульным і цэлым усё залежыць ад нас. Беларусы павінны спадзявацца толькі на сябе і самі вырашаць гэтую праблему», - падкрэсліў Павел Севярынец.

Нагадаем, 20 лютага ў Бруселі камісар ЕЗ па пытаннях пашырэння і еўрапейскай палітыкі добрасуседства Штэфан Фюле сустрэўся з васьмю прадстаўнікамі Беларусі па пытаннях мадэрнізацыі беларускага грамадства.

Еўразвяз заклікаў беларускія ўлады пашырыць свой удзел у дыялогу аб мадэрнізацыі краіны, які еўрапейскія структуры актыўна вядуць з прадстаўнікамі грамадзянскай супольнасці Беларусі.