Італьянцы прадставяць на Берлінале фільм «Жыве Беларусь!»

• 8.02.2013, 12:36

8 лютага адбудзецца паказ фільма «Жыве Беларусь!» на кінафестывалі Берлінале ў рамках Еўрапейскага кінарынка.

Найбольш цікава тое, што фільм будзе прадстаўлены італьянскім павільёнам кампаніі Intramovies, якая з'яўляецца сусветным дыстрыбутарам стужкі, перадае «Радыё Свабода».

У каталогу кінарынка фільм, які падпісаны беларускай лацінкай «Žyvie Biełaruś!» і па-англійску «Viva Belarus!», суседнічае з французскай камедыяй Vive la France! Акрамя таго, Intramovies прэзентуе на фестывалі некалькі італьянскіх і адну нямецкую стужку.

«Жыве Беларусь!» здымаўся ў лістападзе-снежні 2011 года ў Польшчы.

Рэжысёр фільма - паляк Кшыштаф Лукашэвіч. Сцэнарысты - беларускі журналіст і актывіст Франак Вячорка і Кшыштаф Лукашэвіч.

Галоўную ролю - рок-музыкі Мірона Захаркі - выканаў беларускі музыка Зміцер (Вінцэнт) Папко. Фільм зняты на рэальных падзеях і сабраў у сабе гісторыі і лёсы многіх беларусаў, якія прайшлі і працягваюць праходзіць праз рэпрэсіі ў Беларусі.